Ўзбекистонда чет эл фуқаролари томонидан Ўзбекистон ҳудудидан чиқиб кетишдан аввал харид қилинган товарлар учун қўшилган қиймат солиғини (ҚҚС) қайтариш тизими йўлга қўйилади. Бу ҳақда Давлат солиқ қўмитаси хабар бермоқда.
Хорижий давлат фуқароларига айрим турдаги товарларни сотиб олишда тўланган ҚҚС суммасини қайтариш – «тах фрее» тизими тажриба тариқасида жорий этилади.
Tax free қайси маҳсулотларга татбиқ этилади?
Tax free Ўзбекистоннинг барча ҳудудларидаги чакана савдо объектларида қарор билан тасдиқланган рўйхатга киритилган товарларга нисбатан қўлланилади.
Қанча миқдорда харидни амалга ошириш лозим?
Умумий қиймати камида 1 млн сўм бўлган «тах фрее» тизими татбиқ этиладиган товарларни харид қилиш лозим.
Чет эл фуқаролари Тах Free’дан қандай фойдаланиши мумкин?
Бунинг учун чет давлат фуқароси «Солиқ» мобил иловасида рўйхатдан ўтиши ва харидлари бўйича тақдим этилган онлайн-НКТ фискал чекларини сканерлаши керак.
Tax free суммасини ҳисоблаш, уни чет давлат фуқаросининг банк пластик картасига ёки банк ҳисобварағига ўтказиб бериш тизим оператори «Солиқ-сервис» томонидан амалга оширилади.
Ушбу жараёнларни Солиқ мобил иловасида онлайн вақт режимида кузатиб бориш имконияти яратилади.
Чет давлат фуқаролари Ўзбекистон ҳудудини Тошкент, Самарқанд, Бухоро, Фарғона ва Урганч халқаро аэропортлари орқали тарк этганда тизим операторига мурожаат қилган ҳолда маҳсулот харид қилган пайтдан бошлаб 3 ой ичида ҚҚС суммасини қайтаришни расмийлаштиришлари мумкин бўлади.
Тўланган солиқ суммалари қачон қайтарилади?
Tax free суммаси чет давлат фуқаросининг Ўзбекистон ҳудудидан чиқиб кетиш ҳолати тасдиқланган сўнг, харид амалга оширилган ойдан кейинги ойнинг 25-кунидан кейин қайтарилади.
Изоҳ (0)