Ijtimoiy tarmoqlarda qozog‘istonlik ayol Toshkentdagi dorixonalarni ko‘rib, ularning ko‘pligidan hayratga tushgani aks etgan video tarqalib, muhokamalarga sabab bo‘ldi. Farmatsevtika tarmog‘ini rivojlantirish agentligi bunga munosabat bildirdi.
Agentlikning bildirishicha, avvalo qonunchilikka muvofiq, dorixonaga dori vositalarini chakana realizatsiya qiluvchi obyekt sifatida e’tibor qaratish lozim. O‘zbekistondagi dorixonalar sonini aholi jon boshiga taqsimlagan holda rivojlangan davlatlarga qiyoslasa, ko‘rsatkich ularniki bilan deyarli teng holatda.
“Bir hududda dorixonalar joylashuvi bo‘yicha ko‘pligining yaxshi tomoni — bu raqobatni kuchaytiradi, narxlarning tushishiga sabab bo‘ladi. Chunki aholini birinchi navbatda dori vositalarning narxlari o‘ylantiradi. Chetdan olib kelinadigan, shuningdek, O‘zbekiston ishlab chiqaruvchilaridan sotib olinadigan dori vositalari va tibbiyot buyumlarini ulgurji va chakana sotish ularni yetkazib berishda ishtirok etuvchi vositachilar sonidan qat’i nazar, ulgurji savdo uchun sotib olingan qiymatidan 15 foizdan, chakana savdo uchun ulgurji narxidan 20 foizdan ortiq bo‘lmagan miqdorlarda belgilanadigan cheklangan savdo ustamalari qo‘llanilgan holda amalga oshiriladi”, — deb qayd etgan agentlik.
Ta’kidlanishicha, Farmatsevtika tarmog‘ini rivojlantirish agentligi tomonidan mahalliy va xorijiy dori vositalariga nisbatan referent narx shakllantirish tizimi yo‘lga qo‘yilgan bo‘lib, unga ko‘ra: dori shakli, qadoqdagi soni, dozasi, konsentratsiyasi, hajmi va qadoqlanishini hisobga olgan holda dori vositalarining har bir savdo nomi uchun qayd etilgan cheklangan narxlar va ularga cheklangan savdo ustamalarini qo‘llash yo‘li bilan hisoblangan ulgurji va chakana narxlarning elektron (onlayn) reyestri yuritilmoqda.
Bundan tashqari, 2023-yil 1-maydan boshlab jismoniy shaxslar tomonidan dorixonalardan sotib olingan dorilar uchun beriladigan xarid cheki soliq organlarining maxsus mobil ilovasida ro‘yxatdan o‘tkazilganda uning narxi Farmatsevtika tarmog‘ini rivojlantirish agentligining axborot tizimidagi dorilarning chakana referent narxlari bilan avtomatik tarzda solishtirilishi belgilandi.
Dorilarning chakana narxiga belgilangan ustamalar oshirib qo‘llanilganligi aniqlanganda, tegishli chora ko‘rish uchun bu haqida tegishli monopoliyaga qarshi kurashish organiga xabar yuboriladi.
Bundan tashqari, bemorlarni shifoxonada dori vositalari va tibbiy buyumlar bilan ta’minlash tajribasi yo‘lga qo‘yilib, ushbu amaliyot dastavval respublika darajasidagi shifoxonalarda 2023-yil davomida tajriba-sinov tariqasida amalga oshiriladi. Ularga xarajatlar smetasi bo‘yicha ajratilishi ko‘zda tutilgan mablag‘lar hisobidan kafolatlangan tibbiy xizmatlar va dori vositalari paketi doirasida xarid qilinadigan dori vositalari va tibbiy buyumlar bepul, qolgan hollarda pullik asosda shifoxonaga kirim qilingan narxlarda amalga oshiriladi. Bunda, shifoxona tomonidan xarid qilinadigan dori vositalarining narxi belgilangan ulgurji referent narxlaridan yuqori bo‘lmasligi talab etiladi.
Izoh (0)