O‘zbekistonning Rostov-Don shahridagi bosh konsuli Burxon Aliqulov Don davlat texnika universiteti (DDTU) rektori Bisarion Mesxi bilan uchrashib, zamonaviy kadrlar tayyorlash va akademik almashinuv sohasidagi hamkorlik istiqbollarini muhokama qildi, deb xabar bermoqda “Dunyo” axborot agentligi.
Qayd etilishicha, Bisarion Mesxi DDTUning O‘zbekiston oliy o‘quv yurtlari, xususan, Buxoro davlat universiteti va “Ipak yo‘li” turizm xalqaro universiteti bilan hamkorligi darajasidan mamnunligini bildirgan. O‘zbekistonning ushbu universitetlarida DDTU vakolatxonasini ochish yuzasidan fikr almashilgan. U, shuningdek, O‘zbekiston milliy universiteti va Toshkent axborot texnologiyalari universiteti bilan ham akademik hamkorlikni yo‘lga qo‘yishni taklif etgan.
Suhbat chog‘ida veterinariya sohasida qo‘shma loyihalar ishlab chiqish taklifi ilgari surilgan. DDTU Rossiya hududida “veterinariya” yo‘nalishi bo‘yicha aspirantura bosqichiga ega bo‘lgan yagona oliy o‘quv yurti hisoblanadi. Besarion Mesxi soha dolzarbligini inobatga olgan holda, mazkur yo‘nalish O‘zbekiston uchun ham ma’qul kelishi mumkinligini ta’kidlagan.
Izoh (0)