Ижтимоий тармоқларда қозоғистонлик аёл Тошкентдаги дорихоналарни кўриб, уларнинг кўплигидан ҳайратга тушгани акс этган видео тарқалиб, муҳокамаларга сабаб бўлди. Фармацевтика тармоғини ривожлантириш агентлиги бунга муносабат билдирди.
Агентликнинг билдиришича, аввало қонунчиликка мувофиқ, дорихонага дори воситаларини чакана реализация қилувчи объект сифатида эътибор қаратиш лозим. Ўзбекистондаги дорихоналар сонини аҳоли жон бошига тақсимлаган ҳолда ривожланган давлатларга қиёсласа, кўрсаткич уларники билан деярли тенг ҳолатда.
«Бир ҳудудда дорихоналар жойлашуви бўйича кўплигининг яхши томони — бу рақобатни кучайтиради, нархларнинг тушишига сабаб бўлади. Чунки аҳолини биринчи навбатда дори воситаларнинг нархлари ўйлантиради. Четдан олиб келинадиган, шунингдек, Ўзбекистон ишлаб чиқарувчиларидан сотиб олинадиган дори воситалари ва тиббиёт буюмларини улгуржи ва чакана сотиш уларни етказиб беришда иштирок этувчи воситачилар сонидан қатъи назар, улгуржи савдо учун сотиб олинган қийматидан 15 фоиздан, чакана савдо учун улгуржи нархидан 20 фоиздан ортиқ бўлмаган миқдорларда белгиланадиган чекланган савдо устамалари қўлланилган ҳолда амалга оширилади», — деб қайд этган агентлик.
Таъкидланишича, Фармацевтика тармоғини ривожлантириш агентлиги томонидан маҳаллий ва хорижий дори воситаларига нисбатан референт нарх шакллантириш тизими йўлга қўйилган бўлиб, унга кўра: дори шакли, қадоқдаги сони, дозаси, концентрацияси, ҳажми ва қадоқланишини ҳисобга олган ҳолда дори воситаларининг ҳар бир савдо номи учун қайд этилган чекланган нархлар ва уларга чекланган савдо устамаларини қўллаш йўли билан ҳисобланган улгуржи ва чакана нархларнинг электрон (онлайн) реестри юритилмоқда.
Бундан ташқари, 2023 йил 1 майдан бошлаб жисмоний шахслар томонидан дорихоналардан сотиб олинган дорилар учун бериладиган харид чеки солиқ органларининг махсус мобил иловасида рўйхатдан ўтказилганда унинг нархи Фармацевтика тармоғини ривожлантириш агентлигининг ахборот тизимидаги дориларнинг чакана референт нархлари билан автоматик тарзда солиштирилиши белгиланди.
Дориларнинг чакана нархига белгиланган устамалар ошириб қўлланилганлиги аниқланганда, тегишли чора кўриш учун бу ҳақида тегишли монополияга қарши курашиш органига хабар юборилади.
Бундан ташқари, беморларни шифохонада дори воситалари ва тиббий буюмлар билан таъминлаш тажрибаси йўлга қўйилиб, ушбу амалиёт даставвал республика даражасидаги шифохоналарда 2023 йил давомида тажриба-синов тариқасида амалга оширилади. Уларга харажатлар сметаси бўйича ажратилиши кўзда тутилган маблағлар ҳисобидан кафолатланган тиббий хизматлар ва дори воситалари пакети доирасида харид қилинадиган дори воситалари ва тиббий буюмлар бепул, қолган ҳолларда пуллик асосда шифохонага кирим қилинган нархларда амалга оширилади. Бунда, шифохона томонидан харид қилинадиган дори воситаларининг нархи белгиланган улгуржи референт нархларидан юқори бўлмаслиги талаб этилади.
Изоҳ (0)