Turkiyada iste’mol narxlarining o‘sish sur’ati oktabr oyida ketma-ket 17-oy tezlashdi va 25 yil ichida birinchi marta 85 foizdan oshdi. Bu haqda Turkiya statistika instituti — Turkstat ma’lum qildi.
O‘tgan oyda narxlar (CPI indeksi) 1998-yil iyun oyidan beri eng yuqori bo‘lib, yillik ko‘rsatkichda 85,51 foizni tashkil etdi. Sentyabr oyida inflyatsiya 83,45 foiz bo‘lgandi.
Oktyabr oyida iste’mol narxlarining o‘sishi o‘tgan oyga nisbatan 3,54 foizni tashkil etdi. Sentyabr oyida bu ko‘rsatkich 3,08 foiz bo‘lgan.
Rasmiy ma’lumotlarga ko‘ra, inflyatsiyaning tezlashishi asosan transport xizmatlari, oziq-ovqat va alkogolsiz ichimliklar narxlarining oshishi bilan bog‘liq.
Rekord inflyatsiya darajasiga qaramay, Turkiya Markaziy banki oktyabr oyida asosiy foiz stavkasini yana 1,5 foiz punktga pasaytirib, 10,5 foizgacha tushirdi.
Markaziy bank navbatdagi yig‘ilishda stavkani yana bir xil miqdorda pasaytirishga tayyorligini bildirdi, shundan so‘ng pul-kredit siyosatini yumshatish sikli tugashi mumkin.
Shu bilan birga, mamlakatda ishlab chiqaruvchilar narxlarining o‘sish sur’ati (PPI indeksi) oktyabr oyida bir oy oldingi 151,5 foizga nisbatan yillik ko‘rsatkichda 157,7 foizga tezlashdi. Bu 1983-yilda hisob-kitoblar boshlanganidan beri rekord darajadagi o‘sishdir.
Izoh (0)