2022-yilning yanvar—sentabr oylarida O‘zbekistonga import qilingan oziq-ovqat mahsulotlari hajmi 2,46 mlrd dollarni (2021-yilning mos davrida 1,8 mlrd dollar) tashkil etdi. Bu haqda Davlat statistika qo‘mitasi xabar bermoqda.
Joiry yilgi oziq-ovqat importi 2021-yilning yanvar—sentabr oylariga nisbatan 36,8 foizga (663,1 mln dollar) oshdi.
2021-yilning yanvar—sentabr oylarida jami import tarkibida oziq-ovqat mahsulotlarining ulushi 10 foizni tashkil etgan bo‘lsa, 2022-yilning yanvar—sentabr oylarida bu ko‘rsatkich 1,2 foizga ko‘payib, 11,2 foizni tashkil etdi.
Yil boshidan beri 106 mamlakatdan oziq-ovqat mahsulotlari importi amalga oshirilgan. Ular orasida Qozog‘iston yetakchilik qilmoqda — 891,1 mln dollar yoki 36,2 foiz.
Bu borada 590,9 mln dollarlik ko‘rsatkich bilan Rossiya ikkinchi o‘rinni egalladi. Braziliya esa O‘zbekistonga oziq-ovqat yetkazib berish bo‘yicha uchinchi o‘rinda — 362 mln dollar.
Shuningdek, yil boshidan beri Ukrainadan O‘zbekistonga oziq-ovqat yetkazib berish qariyb teng yarmiga kamayib, 21,3 mln dollarni tashkil qilmoqda. Bu Rossiya va Ukraina o‘rtasidagi urush sabab mamlakat qishloq xo‘jaligi zarar ko‘rgani bilan izohlanadi.
Avvalroq O‘zbekistonda 2018—2020-yillarda aholining qancha qismi to‘yib ovqatlanmagani ma’lum bo‘lgandi.
Izoh (0)