2022-yilning o‘tgan 9 oyi mobaynida O‘zbekistonda 2,6 million tonnadan ziyod kartoshka yetishtirildi. Bu o‘tgan yilning shu davriga nisbatan 6,6 foizga ko‘p ko‘rsatkichdir, deya xabar bermoqda EastFruit.
O‘zbekiston Davlat statistika qo‘mitasining dastlabki ma’lumotlariga ko‘ra, 2022-yilning yanvar oyi boshidan sentabr oyi oxiriga qadar O‘zbekistonda kartoshka yetishtirish hajmi 2649 ming tonnani tashkil etgan. Bu 2021-yilning shu davriga nisbatan 164 ming tonnaga yoki 6,6 foizga ko‘pdir.
2021-yilning mos davriga nisbatan kartoshka yetishtirish bo‘yicha fermer xo‘jaliklarida 31,4 foiz (376,7 ming tonnadan 495 ming tonnaga), dehqon (shaxsiy yordamchi) xo‘jaliklarida 0,6 foiz (2091,6 ming tonnadan 2104,1 ming tonnaga) va qishloq xo‘jaligi korxonalarida 3 barobar (16,7 dan 49,9 ming tonnagacha) o‘sish kuzatilgan.
Shunga ko‘ra, 2021-yilning mos davriga nisbatan kartoshka yetishtirishning umumiy hajmida qishloq xo‘jaligi korxonalari ulushi 0,7 foizdan 1,9 foizga, fermer xo‘jaliklari ulushi 15,1 foizdan 18,7 foizga ko‘paydi, lekin dehqon (shaxsiy yordamchi xo‘jaliklar) xo‘jaliklari ulushi 84,2 foizdan 79,4 foizga kamaydi.
Kartoshka yetishtirishning 80 foizdan ortig‘i mamlakatning yetti viloyatiga to‘g‘ri keladi:
- Samarqand — 20,5 foiz;
- Toshkent — 11,4 foiz;
- Surxondaryo — 11,3 foiz;
- Namangan — 9,7 foiz;
- Farg‘ona — 9,6 foiz;
- Andijon — 9,2 foiz;
- Buxoro — 8,8 foiz.
Bu borada O‘zbekistonning qolgan olti viloyatining umumiy ulushi 19,5 foizni tashkil etdi.
2022-yilning 28-oktabr holatiga ko‘ra, O‘zbekistonda kartoshkaning o‘rtacha ulgurji narxi 2021-yilning shu sanasiga nisbatan 20 foizga arzon.
Izoh (0)