Туркияда истеъмол нархларининг ўсиш суръати октябрь ойида кетма-кет 17-ой тезлашди ва 25 йил ичида биринчи марта 85 фоиздан ошди. Бу ҳақда Туркия статистика институти — Туркстат маълум қилди.
Ўтган ойда нархлар (CPI индекси) 1998 йил июнь ойидан бери энг юқори бўлиб, йиллик кўрсаткичда 85,51 фоизни ташкил этди. Сентябр ойида инфляция 83,45 фоиз бўлганди.
Октябр ойида истеъмол нархларининг ўсиши ўтган ойга нисбатан 3,54 фоизни ташкил этди. Сентябр ойида бу кўрсаткич 3,08 фоиз бўлган.
Расмий маълумотларга кўра, инфляциянинг тезлашиши асосан транспорт хизматлари, озиқ-овқат ва алкоголсиз ичимликлар нархларининг ошиши билан боғлиқ.
Рекорд инфляция даражасига қарамай, Туркия Марказий банки октябр ойида асосий фоиз ставкасини яна 1,5 фоиз пунктга пасайтириб, 10,5 фоизгача туширди.
Марказий банк навбатдаги йиғилишда ставкани яна бир хил миқдорда пасайтиришга тайёрлигини билдирди, шундан сўнг пул-кредит сиёсатини юмшатиш цикли тугаши мумкин.
Шу билан бирга, мамлакатда ишлаб чиқарувчилар нархларининг ўсиш суръати (PPI индекси) октябр ойида бир ой олдинги 151,5 фоизга нисбатан йиллик кўрсаткичда 157,7 фоизга тезлашди. Бу 1983 йилда ҳисоб-китоблар бошланганидан бери рекорд даражадаги ўсишдир.
Изоҳ (0)