Kremlda Rossiyada o‘lim jazosiga qo‘yilgan taqiqni bekor qilish imkoniyati muhokama qilinmayapti. Bu haqda Rossiya prezidenti matbuot kotibi Dmitriy Peskov ma’lum qildi, deb yozadi “RBK”.
“Yo‘q, ayni paytda bu borada muhokamalar olib borilmayapti”, — dedi Peskov jurnalistlarga.
Avvalroq Rossiya tarkibidagi Boshqirdiston respublikasi poytaxti Ufa shahrida to‘rt nafar talaba terakt tashkillashtirishda ayblanib, hibsga olinganidan keyin, Rossiya Xavfsizlik kengashi raisi o‘rinbosari, mamlakat sobiq prezidenti va bosh vaziri Dmitriy Medvedev bunga munosabat bildirgan edi. U ayblanuvchilarni “chet ellik talabalar” va “yaramaslar” deb atadi, shuningdek, Ikkinchi jahon urushi davrida “sabotajchilar” (putur yetkazuvchilar, to‘sqinlik qiluvchilar) otib tashlanganini eslatdi.
“Zamonaviy Rossiyada o‘lim jazosiga moratoriy (taqiq) amal qiladi. Bu g‘oyatda insonparvarlik… Lekin, yana bir marta ta’kidlayman, hozirgi Konstitutsiya doirasida ham, Rossiya Konstitutsiyaviy sudi huquqiy pozitsiyasini o‘zgartirishda zarur bo‘lsa, o‘lim jazosiga nisbatan moratoriy yengib o‘tilishi mumkin. Bu odamlarimiz, davlat va jamiyat manfaatlarini himoya qilish vositasini tanlash masalasidir”, — deyiladi Medvedevning postida.
Medvedevga Federatsiya kengashining konstitutsiyaviy qonunchilik bo‘yicha qo‘mitasi rahbari Andrey Klishas bilvosita javob qildi. U Rossiyada amaldagi Konstitutsiya ostida o‘lim jazosini qaytarish mumkin emasligi haqida yozdi. Rossiya Konstitutsiyaviy sudi raisi Valeriy Zorkin ham xuddi shunday pozitsiyani bildirgan.
Medvedev urush boshlanganidan keyin o‘lim jazosini qaytarish haqida ko‘p marta fikr bildirgan. Xususan, bahorda Ukrainada harbiy harakatlar boshlaganidan keyin Rossiya Yevropa kengashidan chiqqanini e’lon qildi, sentabrdan esa Inson huquqlari bo‘yicha Yevropa konvensiyasi tomonlaridan biri bo‘lishdan to‘xtadi va Inson huquqlari bo‘yicha Yevropa sudi yurisdiksiyasidan chiqdi. O‘shanda Xavfsizlik kengashi raisi o‘rinbosari endi Rossiyada o‘lim jazosiga qaytish uchun cheklovlar yo‘qligini aytgandi. Biroq Kreml va Federatsiya kengashi bunday imkoniyatni istisno qildi.
Ma’lumot uchun, hozirgi vaqtda Rossiyada o‘lim jazosiga nisbatan moratoriy joriy etilgan. Moratoriy 2009-yili Konstitutsiyaviy sud qarori bilan mustahkamlab qo‘yilgan. Rossiyada o‘lim jazosi bo‘yicha so‘nggi qatl 1996-yil 2-sentabr kuni amalga oshirilgan. 2015-yilda Rossiya Davlat dumasi deputati Vadim Solovyov terrorchilik harakatini sodir etgan shaxslar uchun eng oliy jazo sifatida o‘lim jazosini joriy etishni taklif qilgandi.
Izoh (0)