Qrim hukumati do‘st bo‘lmagan shaxslar va mamlakatlarga tegishli bo‘lgan hamda milliylashtirish (davlat mulkiga aylantirish) lozim bo‘lgan mol-mulklar va korxonalar ro‘yxatini tuzishda davom etmoqda, deb yozadi “RBK”. Qrim davlat kengashi rahbari Vladimir Konstantinovning aytishicha, gap, shu jumladan, Ukraina prezidenti Vladimir Zelenskiyning kvartirasi haqida ham bormoqda.
“Bunday obyektlarning barchasi, jumladan, Zelenskiyning kvartirasi bo‘yicha aksilterrorchilik komissiyasi ish olib bormoqda. Ishlar tugaganidan keyin xabar beramiz”, — dedi u.
Rossiya Tashqi ishlar vazirligi may oyida Zelenskiyning ko‘chmas mulki musodara etilishiga qarshi chiqqan edi. “Qonuniy asoslar bo‘lmagan holda, xususiy mulkning tortib olinishida normal narsani ko‘rmayapman. Ustiga-ustak, bu axborot kampaniyasining bir qismi bo‘lgan bir paytda”, — degan edi vazirlik vakili Mariya Zaxarova.
Chet elliklarning mol-mulkini musodara qilish uchun qonunchilik bazasini ishlab chiqish avgust oyida Federatsiya kengashida taklif qilingandi.
Reuters ma’lumotlariga ko‘ra, Ukraina prezidentining rafiqasi Yelena Zelenskaya 2013-yil aprelida Qrimda “Imperator” turar joy majmuasidan xonadon sotib olgan. Zelenskiyning shtabi shunday xarid amalga oshirilganini tasdiqlagan. Qrim davlat ro‘yxatiga olish va kadastr qo‘mitasi Qrim Ukraina tarkibida bo‘lgan vaqtda paydo bo‘lgan mulkchilik huquqlarining barchasi Rossiya qonunchiligi bo‘yicha amalda qolishiga ishontirgandi.
Avvalroq Ukraina prezidenti Qrimda dengizni tomosha qilish orzusi haqida gapirgandi. “G‘alabadan keyin Qrimga boraman. Dengizni ko‘rishni juda xohlayman”, — dedi u jangovar harakatlar tugagandan so‘ng birinchi navbatda nima qilishi haqidagi savolga javoban.
Zelenskiyning Qrimdagi kvartirasi uning 2020-yilgi daromadlari haqidagi deklaratsiyasida ham tilga olingandi. Unga ko‘ra, Kiyevda prezidentning bir nechta kvartirasi va avtoturargohlari bor. Turmush o‘rtog‘i Yelena esa Qrim hududida 129,8 kvadrat metrli kvartiraga egalik qiladi (Qrim 2014-yilda Rossiya tarkibiga kirgan bo‘lsa-da, deklaratsiyada ushbu mulk Ukraina hududida joylashgan deb ko‘rsatilgan). Shuningdek, Zelenskiylar juftligi Buyuk Britaniyada ham kvartira ijaraga beradi.
Ma’lumot uchun, 2014-yil mart oyida Qrimda referendum bo‘lib o‘tgan, unda yarimorol aholisining aksariyati Rossiyaga qo‘shilishni qo‘llab-quvvatlagan. Ukraina va bir qator G‘arb davlatlari ovoz berish natijalarini tan olmaydi va sodir bo‘lgan voqealarni “anneksiya” deb hisoblaydi. AQSH Qrimning Rossiyaga qo‘shilishini hech qachon tan olmaslikka so‘z bergan. Rossiya hukumati bir necha bor Qrim masalasi tarixan yopiq ekanini ta’kidlagan.
2022-yilning mart oyida Rossiya prezidenti matbuot kotibi Dmitriy Peskov Qrimning Rossiya hududi sifatida tan olinishi Ukrainadagi bosqinni to‘xtatishi mumkin bo‘lgan shartlardan biri bo‘lishini aytgan.
Izoh (0)