Песков: «Кремль ўлим жазосини қайтариш имкониятини муҳокама қилмаяпти»

Кремлда Россияда ўлим жазосига қўйилган тақиқни бекор қилиш имконияти муҳокама қилинмаяпти. Бу ҳақда Россия президенти матбуот котиби Дмитрий Песков маълум қилди, деб ёзади «РБК».

«Йўқ, айни пайтда бу борада муҳокамалар олиб борилмаяпти», — деди Песков журналистларга.

Аввалроқ Россия таркибидаги Бошқирдистон республикаси пойтахти Уфа шаҳрида тўрт нафар талаба теракт ташкиллаштиришда айбланиб, ҳибсга олинганидан кейин, Россия Хавфсизлик кенгаши раиси ўринбосари, мамлакат собиқ президенти ва бош вазири Дмитрий Медведев бунга муносабат билдирган эди. У айбланувчиларни «чет эллик талабалар» ва «ярамаслар» деб атади, шунингдек, Иккинчи жаҳон уруши даврида «саботажчилар» (путур етказувчилар, тўсқинлик қилувчилар) отиб ташланганини эслатди.

«Замонавий Россияда ўлим жазосига мораторий (тақиқ) амал қилади. Бу ғоятда инсонпарварлик… Лекин, яна бир марта таъкидлайман, ҳозирги Конституция доирасида ҳам, Россия Конституциявий суди ҳуқуқий позициясини ўзгартиришда зарур бўлса, ўлим жазосига нисбатан мораторий енгиб ўтилиши мумкин. Бу одамларимиз, давлат ва жамият манфаатларини ҳимоя қилиш воситасини танлаш масаласидир», — дейилади Медведевнинг постида.

Медведевга Федерация кенгашининг конституциявий қонунчилик бўйича қўмитаси раҳбари Андрей Клишас билвосита жавоб қилди. У Россияда амалдаги Конституция остида ўлим жазосини қайтариш мумкин эмаслиги ҳақида ёзди. Россия Конституциявий суди раиси Валерий Зоркин ҳам худди шундай позицияни билдирган.

Медведев уруш бошланганидан кейин ўлим жазосини қайтариш ҳақида кўп марта фикр билдирган. Хусусан, баҳорда Украинада ҳарбий ҳаракатлар бошлаганидан кейин Россия Европа кенгашидан чиққанини эълон қилди, сентябрдан эса Инсон ҳуқуқлари бўйича Европа конвенцияси томонларидан бири бўлишдан тўхтади ва Инсон ҳуқуқлари бўйича Европа суди юрисдиксиясидан чиқди. Ўшанда Хавфсизлик кенгаши раиси ўринбосари энди Россияда ўлим жазосига қайтиш учун чекловлар йўқлигини айтганди. Бироқ Кремль ва Федерация кенгаши бундай имкониятни истисно қилди.

Маълумот учун, ҳозирги вақтда Россияда ўлим жазосига нисбатан мораторий жорий этилган. Мораторий 2009 йили Конституциявий суд қарори билан мустаҳкамлаб қўйилган. Россияда ўлим жазоси бўйича сўнгги қатл 1996 йил 2 сентябрь куни амалга оширилган. 2015 йилда Россия Давлат думаси депутати Вадим Соловёв террорчилик ҳаракатини содир этган шахслар учун энг олий жазо сифатида ўлим жазосини жорий этишни таклиф қилганди.