Rossiya rasmiylarining Kiyev “iflos bomba” yaratayotgani haqidagi da’volaridan so‘ng, Atom energiyasi bo‘yicha xalqaro agentlik — MAGATE Ukrainadagi uchta yadroviy inshootni tekshirdi. Tekshiruv o‘tkazilgan joylarda hech qanday yashirin yadroviy faollik belgilari topilmadi, deyiladi MAGATE bayonotida.
“MAGATE inspektorlari Ukraina hukumatining so‘roviga binoan mamlakatning uchta joyida olib borilgan tekshiruv ishlarini yakunladi. Tekshiruv jarayonida yashirin yadroviy faoliyat va materiallar haqida hech qanday dalil topilmadi”, — deyiladi agentlik xabarida.
“Iflos bomba” atrofidagi mojaro
24-oktabr kuni Rossiya tomoni Ukrainadagi ikkita tashkilotga “iflos bomba” yaratish bo‘yicha aniq topshiriqlar berilgani, ishlar yakuniy bosqichda turganini ma’lum qildi. Rossiya Qurolli kuchlari radiatsiyaviy, kimyoviy va biologik himoya qo‘shinlari boshlig‘i general-leytenant Igor Kirillov so‘zlariga ko‘ra, Ukraina o‘z AESlarida, konchilik korxonalarida “iflos bomba” uchun xomashyoga ega, bundan tashqari, Kiyev va Xarkovda ilmiy bazasi ham bor.
Shundan keyin Ukraina Tashqi ishlar vazirligi MAGATEga mamlakatga o‘z inspeksiyasini yuborishni taklif qildi. “Yashiradigan hech narsamiz yo‘q”, — dedi vazir Dmitriy Kuleba.
23-oktabr kuni mudofaa vaziri Sergey Shoygu NATOning to‘rtta davlatidagi hamkasblari bilan bog‘lanib, Ukraina “iflos bomba” yordamida “provokatsiya”ni rejalashtirayotganini aytdi. Ukraina “iflos bomba” haqidagi xabarlarni yolg‘on deb atadi. Prezident Vladimir Zelenskiy Ukrainada bunday bombadan faqat Rossiya foydalanishi mumkinligini aytdi.
G‘arb davlatlari fikricha, Rossiyaning “iflos bomba” haqidagi ogohlantirishlari yangi eskalatsiya uchun bahona. “Ukraina o‘z hududida iflos bomba qo‘llashga tayyorlanayotgani haqidagi Rossiyaning ochiqdan ochiq yolg‘on da’volarini barchamiz rad etamiz”, — deyiladi Fransiya, Buyuk Britaniya va AQSH tashqi ishlar vazirlari qo‘shma bayonotida.
“Iflos bomba” — radioaktiv moddalardan tarkib topgan, biroq oddiy portlovchi moddaga asoslangan, ya’ni mustaqil yadroviy reaksiyaga qodir bo‘lmagan faraziy portlovchi qurilma. “Iflos bomba” odatda terroristik hujumning ehtimoliy turlaridan biri deb hisoblaniladi.
Izoh (0)