Oktabr oyining o‘rtalarida, Ukraina Qurolli kuchlarining qarshi hujumi fonida, Rossiya zirhli texnikalaridan kunlik yo‘qotishlar soni 40 tadan oshdi. Bu haqda Britaniya Mudofaa vazirligi Ukrainadagi urushning borishi haqidagi kunlik tahlilida ma’lum qildi.
Vazirlik ma’lumotlariga ko‘ra, so‘nggi haftalarda harbiy texnikadagi yo‘qotishlar o‘rnini qoplash uchun Rossiya Belarus zaxirasidan kamida yuzta qo‘shimcha tank va piyodalarning jangovar texnikasini sotib olishga majbur bo‘lgan.
Britaniya vazirligining ta’kidlashicha, zirhli va artilleriya bo‘linmalari Rossiyaning urush strategiyasida markaziy o‘rin tutadi. Hozirda, deyiladi hisobotda, Ukrainadagi Rossiya kuchlari artilleriya o‘q-dorilari bilan birga xizmatga yaroqli zirhli transport vositalarining yetishmasligi tufayli qiyinchiliklarni boshdan kechirmoqda.
Rossiya askarlari esa, vazirlik fikricha, eski piyoda jangovar mashinalarida jang qilishga majburlanayotganidan g‘azabda, ular bunday mashinalarni “konserva qutilari” deb atagan.
Britaniya Mudofaa vazirligi avvalgi hisobotlaridan birida Rossiyadagi safarbarlik doirasida xizmatga chaqirilganlar eski qurollar bilan frontga jo‘natilayotgani haqida xabar bergan edi.
Izoh (0)