Rossiyada harbiy xizmat muddatini ikki yilga oshirish taklifi muhokama qilinmoqda. Bunday taklifni Davlat dumasining Qrimdan saylangan deputati Mixail Sheremet ilgari surdi. U xizmat muddatini bir yildan ikki yilgacha etib belgilashni “imkon qadar tezroq amalga oshirish zarur” deb hisoblamoqda, deb xabar berdi “RIA Novosti”.
Uning so‘zlariga ko‘ra, texnika takomillashib, dunyo olg‘a bormoqda, Qurolli kuchlarga yangi tizimlar, yangi komplekslar kiritilmoqda, ularni esa bir yilda o‘zlashtirib bo‘lmaydi. “Shuning uchun men bunday taklifni olqishlayman, bu mutlaqo to‘g‘ri, deb o‘ylayman”, — dedi deputat.
Federatsiya Kengashining mudofaa qo‘mitasi rahbari Viktor Bondarev ham Rossiyada ikki yillik muddatli harbiy xizmat muddatini qaytarish tarafdori.
Uning aytishicha, ayni paytda bu masala muhokama qilinmoqda. “Biz (Federatsiya Kengashi qo‘mitasi) Mudofaa vazirligi, harbiy xizmat ko‘rsatiladigan boshqa huquq-tartibot idoralari bilan maslahatlashamiz. O‘ylaymanki, bularning barchasi qo‘llab-quvvatlanadi”, — dedi Bondarev.
Shu bilan birga, Bondarev bunday qaror qachon qabul qilinishi mumkinligini oldindan aytib bo‘lmasligini ta’kidladi.
U dengiz floti kemalarida ham xizmat ikki yil davom etishi kerak, deb hisoblamoqda.
2008-yildan buyon rossiyalik harbiy xizmatchilar bir yil muddatga armiyada xizmat qiladi. Undan avval quruqlikdagi kuchlarda xizmat ikki yil, dengiz flotida esa uch yil davom etgan.
Izoh (0)