Finlyandiya va Shvetsiya Turkiya tomoni yuborgan ekstraditsiya ro‘yxatidan birorta terrorchini haligacha Anqaraga topshirgani yo‘q. Turkiya adliya vaziri Bekir Bozdag Xelsinki va Stokgolmni terrorchilarni ekstraditsiya qilishdan bosh tortishda aybladi, deb yozmoqda “TASS”.
Turkiya Adliya vazirligi rahbari Anqara o‘z talablarini ikki davlatga yetkazganini ta’kidladi. “Ekstraditsiya mavzusi muhokama qilinmoqda, biroq terrorchilik faoliyati bilan shug‘ullangan shaxslarni ekstraditsiya qilish masalasida hozircha ijobiy o‘zgarishlar bo‘lgani yo‘q”, — dedi u.
Bozdagning so‘zlariga ko‘ra, ekstraditsiya masalasi, xususan, Shvetsiya bosh vaziri Ulf Kristerssonning 8-noyabr kuni Turkiyaga tashrifi chog‘ida muhokama qilinadi.
Avvalroq NATO bosh kotibi Yens Stoltenberg Turkiyaga tashrif buyurib, prezident Rajab Toyyib Erdo‘g‘on bilan uchrashishi hamda Shvetsiya va Finlyandiyaning alyansga a’zoligi masalasini muhokama qilishi haqida xabar qilingandi. Stoltenberg alyansning barcha a’zolari yangi mamlakatlarning qo‘shilishi to‘g‘risidagi protokolni imzolashiga ishonch bildirgan.
6-iyul kuni Turkiya Shvetsiya va Finlyandiyaga Kurdiston ishchilar partiyasi va Fathulloh Gulenning FETO muxolifat tashkiloti a’zolarini ekstraditsiya qilish bo‘yicha rasmiy so‘rov yuborgan edi. Bu Anqaraning ushbu ikki davlatni NATOga qabul qilish shartnomasini ma’qullash sharti deb ataldi.
Izoh (0)