Markaziy bank 2022-yilning uchinchi choragi uchun biznes kayfiyati sharhini taqdim qildi.
Ushbu sharh Markaziy bank tomonidan tadbirkorlarning biznes kayfiyatini o‘rganish maqsadida 2022-yilning iyul oyida o‘tkazilgan so‘rov asosida tayyorlangan.
Tadbirkorlarning fikricha O‘zbekistonda 2022-yil uchinchi choragida biznes sharoitlari va muhiti o‘tgan chorakka nisbatan yaxshilandi.
Bunda, Qoraqalpog‘iston Respublikasi, Andijon, Jizzax, Navoiy, Namangan, Samarqand hamda Farg‘ona viloyatlaridagi biznes sharoitlari O‘zbekiston bo‘yicha o‘rtacha ko‘rsatkichdan yuqori shakllandi.
Ushbu davrda energiya iste’moli ko‘payganini ta’kidlagan biznesmenlar ulushi 40 foizni tashkil etdi (II chorakda 43 foiz).
Yuk tashish hajmida esa o‘sish kuzatilgan bo‘lib, yuk tashish hajmi o‘sganligini ta’kidlagan biznes vakillari ulushi 42 foizgacha yuqorilagan (II chorakda 39 foiz).
Shuningdek, tadbirkorlarning 20 foizga yaqini (II chorakda 24,5 foiz) to‘liq faoliyat yurita olmaganliklarini qayd etishgan.
Joriy yilning III choragida ishbilarmonlarning aksariyat qismida ishchi kuchiga bo‘lgan talab o‘tgan chorak darajasida bo‘lgan.
Shuningdek, maishiy xizmat, tibbiyot, umumiy ovqatlanish va savdo sohalarda qo‘shimcha ishchi kuchiga bo‘lgan talab biroz oshgan.
Ayni vaqtda, tadbirkorlardan ish so‘rab keluvchilar soni ko‘paygan. Bunda, fan-ta’lim, tibbiyot, turizm va tashish xizmati sohalarida ish qidiruvchilar soni oshgan.
O‘rganilayotgan davrda tadbirkorlar qarz yuklamalari (kredit va foiz to‘lovlar) o‘tgan chorakka nisbatan biroz oshganligini ta’kidlashgan.
Jumladan, joriy yilning II choragida ushbu ko‘rsatkich 40 foizni tashkil qilgan bo‘lsa, III chorakka kelib 43 foizga yetgani ta’kidlangan.
Tadbirkorlarning kelgusi davr uchun kutilmalari optimistik shakllangan. Xususan, kelgusi 12 oy hamda yaqin 3 yilda mamlakatimiz iqtisodiyoti hamda biznes istiqbollarini ijobiy baholagan ishtirokchilarning ulushi o‘rtacha 70 foizni tashkil etdi (II chorakda 66 foizga teng)
Izoh (0)