Марказий банк 2022 йилнинг учинчи чораги учун бизнес кайфияти шарҳини тақдим қилди.
Ушбу шарҳ Марказий банк томонидан тадбиркорларнинг бизнес кайфиятини ўрганиш мақсадида 2022 йилнинг июль ойида ўтказилган сўров асосида тайёрланган.
Тадбиркорларнинг фикрича Ўзбекистонда 2022 йил учинчи чорагида бизнес шароитлари ва муҳити ўтган чоракка нисбатан яхшиланди.
Бунда, Қорақалпоғистон Республикаси, Андижон, Жиззах, Навоий, Наманган, Самарқанд ҳамда Фарғона вилоятларидаги бизнес шароитлари Ўзбекистон бўйича ўртача кўрсаткичдан юқори шаклланди.
Ушбу даврда энергия истеъмоли кўпайганини таъкидлаган бизнесменлар улуши 40 фоизни ташкил этди (II чоракда 43 фоиз).
Юк ташиш ҳажмида эса ўсиш кузатилган бўлиб, юк ташиш ҳажми ўсганлигини таъкидлаган бизнес вакиллари улуши 42 фоизгача юқорилаган (II чоракда 39 фоиз).
Шунингдек, тадбиркорларнинг 20 фоизга яқини (II чоракда 24,5 фоиз) тўлиқ фаолият юрита олмаганликларини қайд этишган.
Жорий йилнинг III чорагида ишбилармонларнинг аксарият қисмида ишчи кучига бўлган талаб ўтган чорак даражасида бўлган.
Шунингдек, маиший хизмат, тиббиёт, умумий овқатланиш ва савдо соҳаларда қўшимча ишчи кучига бўлган талаб бироз ошган.
Айни вақтда, тадбиркорлардан иш сўраб келувчилар сони кўпайган. Бунда, фан-таълим, тиббиёт, туризм ва ташиш хизмати соҳаларида иш қидирувчилар сони ошган.
Ўрганилаётган даврда тадбиркорлар қарз юкламалари (кредит ва фоиз тўловлар) ўтган чоракка нисбатан бироз ошганлигини таъкидлашган.
Жумладан, жорий йилнинг II чорагида ушбу кўрсаткич 40 фоизни ташкил қилган бўлса, III чоракка келиб 43 фоизга етгани таъкидланган.
Тадбиркорларнинг келгуси давр учун кутилмалари оптимистик шаклланган. Хусусан, келгуси 12 ой ҳамда яқин 3 йилда мамлакатимиз иқтисодиёти ҳамда бизнес истиқболларини ижобий баҳолаган иштирокчиларнинг улуши ўртача 70 фоизни ташкил этди (II чоракда 66 фоизга тенг)
Изоҳ (0)