O‘zbekistonda oktabr oyida 1,2 foizlik inflyatsiya qayd etildi. Bu haqda Davlat statistika qo‘mitasi hisobotida qayd etilgan.
Shu tariqa, oktabrda narxlar aprel oyidan beri eng ko‘p o‘sdi. Aprelda 1,5 foizlik inflyatsiya qayd etilgan edi.
Yil boshidan beri inflyatsiya 9,4 foizga yetgan bo‘lsa, yillik hisobda hamon 12,2 foizni tashkil etmoqda.
May oyida narxlar oshishi 1 foizni tashkil qilgan edi. Iyunda esa 0,9 foizlik inflyatsiya kuzatilgan.
Iyul oyida 2022-yil hisobi bo‘yicha ilk bor 0,1 foizlik deflyatsiya (narxlar tushishi) qayd etilgan edi. Avgust oyida narxlar o‘sishni boshlagan va bu sentabrda ham davom etdi.
Oktabrda narxlar oshishi bo‘yicha yetakchilik xizmatlarga tegishli bo‘lib, oy davomida ularning narxlari o‘rtacha 1,5 foizga oshdi.
Oziq-ovqat mahsulotlari ushbu davrda 1,4 foizga, nooziq-ovqat mahsulotlar narxlari esa oy davomida 0,9 foizga oshdi.
Joriy yiilning oktabrida oziq-ovqat mahsulotlari o‘tgan yilning oxiriga nisbatan (11,5 foiz) narxlar oshishi bo‘yicha yetakchilikni saqlab qoldi va ular narxlarining 2022-yil yanvar—oktabrdagi o‘rtacha oylik o‘sish sur’ati 1,1 foizni tashkil etdi.
Nooziq—ovqat mahsulotlar narxlari ushbu davrda 8,9 foizga oshdi, o‘rtacha oylik o‘sish sur’ati 0,9 foizni tashkil etdi.
Xizmatlar narxlarining o‘sish sur’ati 2022-yilning yanvar-oktabrida 6,4 foizga yetdi va o‘rtacha oylik o‘sish sur’ati 0,6 foizni tashkil etdi.
Oziq-ovqat mahsulotlarining yilik nisbatdagi narxlarining o‘sish sur’ati 2022-yilning oktabr oyida 15,9 foizga yetib, ushbu guruhning mutlaq yetakchiligini ta’minladi.
Nooziq-ovqat mahsulotlar va pullik xizmatlar ushbu davrda mos ravishda 10,7 foiz va 7,5 foizga qimmatlashgan.
Izoh (0)