AQSH prezidenti Jo Bayden Rossiya prezidenti Vladimir Putinning Rossiya Ukrainada yadro qurolidan foydalanmoqchi emasligi haqida bergan bayonotlariga fikr bildirdi.
“Agar uning bunday niyati yo‘q bo‘lsa, nega bu haqda gapirishda davom etmoqda? Nega u taktik yadro qurolidan foydalanish imkoniyati haqida gapiryapti? U vaziyatga juda xavfli tarzda yondashmoqda”, — dedi Bayden Newsnation telekanaliga bergan intervyusida.
AQSH prezidenti, shuningdek, Putin “shunchaki Ukrainadan chiqib ketish orqali hammasiga barham berishi mumkin”ligini ta’kidladi.
27-oktabr kuni “Valday” munozara klubi yig‘ilishida Putin Rossiya Ukrainaga yadroviy zarba bermasligini aytgandi. “Bizda na siyosiy, na harbiy jihatdan bunday niyat yo‘q”, — dedi Rossiya prezidenti.
Sentabr oyida Putin agar hududiy yaxlitligiga tahdid tug‘ilsa, Rossiya yadro qurolidan foydalanishi mumkinligini aytgan. O‘shanda u bu “po‘pisa emas”ligini ta’kidlagan. Shundan ko‘p o‘tmay, Rossiya Ukrainaning to‘rtta viloyatini anneksiya qilganini e’lon qildi.
Izoh (0)