Seulning Ukrainaga qurol-yarog‘ va o‘q-dorilar yetkazib berish qarori Rossiya va Koreya Respublikasi o‘rtasidagi munosabatlarga putur yetkazishi mumkin. Bu haqda Rossiya prezidenti Vladimir Putin aytib o‘tdi, deb yozadi “Interfaks”.
“Bizning Koreya Respublikasi bilan aloqalarimiz juda do‘stona. Va biz doim Koreya Respublikasi bilan ham, KXDR bilan ham muloqot olib borish imkoniyatiga ega bo‘lganmiz. Ammo hozir bizga ma’lum bo‘lishicha, Koreya Respublikasi Ukrainaga qurol-yarog‘ va o‘q-dori yetkazib berishga qaror qilgan. Bu munosabatlarimizni buzadi”, — dedi u “Valday” xalqaro muhokama forumi yalpi sessiyasida nutq so‘zlar ekan.
“Biz Shimoliy Koreya bilan yadro yo‘nalishida hamkorlikni qayta tiklasak, Koreya Respublikasi bunga qanday qaragan bo‘lardi?” — degan savolni o‘rtaga tashladi Rossiya prezidenti.
Bunga javoban Janubiy Koreya prezidenti Yun Sok Yol mamlakat hech qachon Ukrainaga qirg‘in qurolini taqdim etmaganini aytdi.
“Biz dunyo hamjamiyati bilan birdamlik belgisi sifatida Ukrainaga gumanitar va tinchlik yordamini berganmiz, biroq hech qachon qirg‘in quroli yoki shunga o‘xshash biron narsa taqdim etmaganmiz”, — deya prezident gaplaridan iqtibos keltirdi “Ryonxap” agentligi.
Uning qo‘shimcha qilishicha, Janubiy Koreya “butun dunyo bo‘ylab barcha mamlakatlar bilan, shu jumladan, Rossiya bilan ham do‘stona va yaxshi munosabatlarni saqlab qolishga” intiladi.
Izoh (0)