АҚШ президенти Жо Байден Россия президенти Владимир Путиннинг Россия Украинада ядро қуролидан фойдаланмоқчи эмаслиги ҳақида берган баёнотларига фикр билдирди.
«Агар унинг бундай нияти йўқ бўлса, нега бу ҳақда гапиришда давом этмоқда? Нега у тактик ядро қуролидан фойдаланиш имконияти ҳақида гапиряпти? У вазиятга жуда хавфли тарзда ёндашмоқда», — деди Байден Newsnation телеканалига берган интервьюсида.
АҚШ президенти, шунингдек, Путин «шунчаки Украинадан чиқиб кетиш орқали ҳаммасига барҳам бериши мумкин»лигини таъкидлади.
27 октябрь куни «Валдай» мунозара клуби йиғилишида Путин Россия Украинага ядровий зарба бермаслигини айтганди. «Бизда на сиёсий, на ҳарбий жиҳатдан бундай ният йўқ», — деди Россия президенти.
Сентябрь ойида Путин агар ҳудудий яхлитлигига таҳдид туғилса, Россия ядро қуролидан фойдаланиши мумкинлигини айтган. Ўшанда у бу «пўписа эмас»лигини таъкидлаган. Шундан кўп ўтмай, Россия Украинанинг тўртта вилоятини аннексия қилганини эълон қилди.
Изоҳ (0)