Putinning atrofi 50 grammdan ichib olib, “Endi yadro qurolidan foydalanamiz!” deb baqirayotgan “kuchuk”lardan iborat — Zelenskiy
Ukraina prezidenti Vladimir Zelenskiy Germaniyaning ZDF kanaliga bergan intervyusida Rossiya bilan muzokoralar haqida gapirdi, deb yozadi “Fokus”.
Ukraina prezidenti Putinning atrofidagilarni “har biri 50 grammdan ichib olib, yadro urushi bilan tahdid qilayotgan kuchukchalar” deb atadi.
“Putinning atrofidagilar, uning kuchuklari — ular hatto it ham emas — shunchaki kuchukchalar. Ularning har biri 50 grammdan aroq ichib olib: “Ertaga yadro qurolidan foydalanamiz!” deb jar soladi”, — dedi Ukraina rahbari jurnalistning Rossiyaning yadroviy shantaji haqidagi savoliga javoban.
Shuningdek, u Ukraina dushman bilan muzokaralar olib borish niyatida emasligini qayd etdi.
“Sizlarni [ruslarni] yadro qurolidan foydalanish haqida gapiradigan odam boshqarayapti. Biz u bilan gaplasha olmaymiz. Siz bilan bir stolda o‘tirolmaymiz, chunki biz terrorchilar bilan muomala qilishni istamaymiz”, — dedi Zelenskiy.
Ukraina prezidentining so‘zlariga ko‘ra, Moskva G‘arbning kuchli pozitsiyasiga duch kelsa, yadro qurolidan foydalanmaydi. Uning so‘zlariga ko‘ra, Yevropa davlatlari hamon Rossiya va uning tahdididan cho‘chimoqda.
“Yevropa hali ham bir oz qo‘rquv hissi bilan yashayapti”, — deya qo‘shimcha qildi Ukraina rahbari.
Ammo Moskvadan kelayotgan barcha tahdidlar va yadroviy shantajga urinish G‘arbning Rossiyaga tashabbusni o‘z qo‘liga olishga ruxsat bergani bilan bog‘liq.
“Yevropa (Rossiyaga) ta’zim qildi. Lekin bunga yo‘l qo‘yib bo‘lmaydi! Ularning ko‘ziga tik boqish kerak. Men ruslar ta’zim qilishlari kerak, demoqchi ham emasman. Barcha davlatlar teng bo‘lishi va bir-biriga tik ko‘z bilan qarashi kerak”, — deya ta’kidladi Ukraina rahbari.
“Ayni paytda Yevropaning vazifasi tashabbusni Rossiya Federatsiyasidan tortib olishdir”, — deya qayd etdi Zelenskiy.
Mavzuga doir:
- “Rossiya gaz infratuzilmalarimizga zarba beradi va aybni o‘zimizga ag‘daradi” — Zelenskiy
- “Rossiya tinchlikning afzalligi haqida o‘ylashi uchun hisob-raqamlarida nolni ko‘rishi kerak” — Zelenskiy Moskvani neft-gaz daromadlaridan mahrum qilishga chaqirdi
