Shimoliy Koreya Yapon dengizi tomon noma’lum turdagi ballistik raketalarni uchirdi. Bu haqda Janubiy Koreya harbiylariga tayanib, Yonhap agentligi xabar berdi.
KXDR raketalari Janubiy Koreyaning har yilgi “Xoguk” o‘quv mashg‘ulotlari yakunlangan paytda uchirilgan. Kelasi hafta Seul va Vashington Vigilant Storm keng ko‘lamli qo‘shma mashg‘ulotlarini boshlaydi.
Keyinroq agentlik Janubiy Koreya Shtab boshliqlariga tayanib, Pxenyan Yapon dengizi tomon ikkita qisqa masofali ballistik raketa uchirganiga aniqlik kiritdi. Ular Kanvondo provinsiyasidan uchirilgan.
KXDR oxirgi marta raketa sinovlarini 14-oktabrda o‘tkazgan edi. O‘shanda Pxenyan qisqa masofali ballistik raketa uchirdi. Janubiy Koreya harbiylariga ko‘ra, u taxminan 700 km masofani maksimal 6 Max tezlikda bosib o‘tgan.
Undan avval KXDR Kim Chen Inning shaxsan rahbarligida uzoq masofali strategik qanotli raketalarni uchirgan edi. Ular Sariq dengiz ustidan uchib o‘tgan va “taxminan 2 ming km masofadagi nishonga teggan”.
Umuman olganda, sentabr oxiridan beri Shimoliy Koreya o‘nga yaqin ballistik raketalarni uchirdi.
Izoh (0)