Internetda Xitoy xalq respublikasi sobiq yetakchisi Xu Szintaoning Pekinda Kommunistik partiya qurultoyi yig‘ilishida zaldan olib chiqib ketilishi bilan bog‘liq yangi kadrlar paydo bo‘ldi, deb yozadi Tengrinews.
Videoda Szintao majlisdan chiqarib ketilishidan oldin bo‘lgan voqealar aks etgan.
Video zalda Xu bilan yonma-yon o‘tirgan Butunxitoy xalq vakillari yig‘ilishi doimiy qo‘mitasi raisi Li Chjanshu undan qo‘lidagi hujjatlarni olib qo‘yib, qizil jildga qaytarib solib qo‘yishi va unga nimadir deyishi bilan boshlangan.
Dastlab u qog‘ozlarni sobiq yetakchning qarshisida qoldirgan. So‘ng, aftidan, Xu Szintao hujjatni yana olishga urinayotganidan xavotirlanib, Li qog‘ozlarni o‘zi tomonga tortib olgan.
Shundan keyin Xitoy raisi Si Szinpin bir odamga ko‘rsatmalar bergan, u esa Xuni ketishga ko‘ndirmoqchi bo‘lgan. Turib ketayotganida sobiq rais o‘z davomchisining stol ustida turgan qaydlarini olmoqchi bo‘lgan. Ammo Si qog‘ozlarni ushlab qolish uchun qo‘lini cho‘zgan.
Avvalroq “Sinxua” rasmiy axborot agentligi Xu Szintaoning to‘satdan ketib qolishini uning sog‘lig‘i yomonlashgani bilan izohlagan, lekin hech qanday tafsilotlarni keltirmagan edi.
Ta’kidlash joiz, Channel News Asia telekanali tomonidan tasvirga olingan yangi lavhalar Xuning mazasi qochgani haqidagi rasmiy versiyaga zid emas. Ayni vaqtda esa ular voqeada Xu Szintao qarshisida yotgan hujjatga qanday munosabatda bo‘lgani ham rol o‘ynaganini taxmin qilish imkonini beradi.
Avvalroq Xitoy sobiq rahbari Xu Szintao Kompartiya qurultoyida zaldan majburan olib chiqib ketilgani haqida xabar berilgan edi. Videolavhalarga qaraganda, 79 yoshli Xu uchun bu kutilmagan vaziyat bo‘lgan, u o‘z joyini tark etishni istamagan.
Xu Szintao prezidiumda mamlakatning amaldagi raisi Si Szinpin bilan yonma-yon o‘tirgan. Xu Szintao prezidiumni tark etayotganida Siga qarata nimadir dedi, u esa bunga javoban bosh irg‘idi. Shundan keyin Xitoy sobiq rahbari majlislar zalidan olib ketilgan.
Qurultoyning yopilish marosimida Xu Szintaoning joyi bo‘sh qolgan. Xitoy Kommunistik partiyasining 16-oktabrdan 22-oktabrgacha bo‘lib o‘tgan qurultoyidan keyin Si Szinpin yana besh yillik muddatga partiya va mamlakat yetakchisi sifatida saylandi.
Xu Szintao 2003-yildan 2013-yilgacha Xitoy yetakchisi bo‘lgan va besh yillik ikkita muddatdan keyin hokimiyatni Si Szinpinga topshirgan.
Izoh (0)