NATOning yadroviy tiyib turish bo‘yicha Steadfast Noon (“Mustahkam choshgoh”) rejali o‘quv mashg‘ulotlari bugun, 17-oktabr kuni boshlanib, 30-oktabrga qadar davom etadi, unda 14 ta mamlakat va 60 tagacha harbiy samolyotlar qatnashadi, deb xabar beradi EA Daily. Alyans bayonotiga ko‘ra, mashqlar “Yevropa shimoli-g‘arbi osmonida” — Belgiya va Britaniya havo hududida, shuningdek, Shimoliy dengiz osmonida o‘tkaziladi. Mashg‘ulotlar chog‘ida jangovar quroldan foydalanilmaydi.

Belgiya OAVlari aniqlik kiritishicha, mamlakat Harbiy-havo kuchlarining Limburg provinsiyasidagi Klyayn Brogel bazasi mashg‘ulotlar markazi vazifasini o‘taydi. Belgiyaning yadro quroliga qarshi koalitsiyasi ma’lumotlariga qaraganda, u yerda AQSH yadroviy kallaklari saqlanadi. Rasmiy hukumat bu ma’lumotni tasdiqlagani yo‘q.

Alyans bosh kotibi Yens Stoltenberg aniqlik kiritishicha, “bu har yili o‘tkaziladigan rejali mashqlar bo‘lib, NATOning yadroviy imkoniyatlari xavfsizligi va samaradorligini ta’minlashga qaratilgan”. Uning ta’kidlashicha, harbiy mashg‘ulotlar Ukraina atrofidagi joriy inqiroz bilan bog‘liq emas.

Belgiyaning RTBF telekanali xabariga ko‘ra, mashg‘ulotlarda ishtirok etayotgan NATO mamlakatlari harbiy samolyotlarining birortasi ham Rossiya hududiga 1000 kilometrdan ortiq yaqinlashmaydi.

Shunga qaramay, Belgiyaning yadro quroliga qarshi koalitsiyasi keskin xalqaro muhitni hisobga olgan holda, mashqlarni bekor qilishni talab etdi. “Rossiya bilan yadroviy sohada keskinlik yuqori bo‘lgan davrda bunday mashg‘ulotlarni o‘tkazish mas’uliyatsizlikdir”, — deyiladi tashkilot bayonotida.

Yadroga qarshi koalitsiya taxmin qilishicha, Belgiya hududidagi bunday mashg‘ulotlar yadroviy ziddiyat yuzaga kelgan taqdirda, ushbu mamlakatni potensial nishonga aylantiradi, ayniqsa, Bryusselda NATO bosh qarorgohi va Yevroittifoqning bosh institutlari joylashganini hisobga olganda.

Shu yilning iyun oyida Madriddagi sammitda yangilangan NATO Strategik konsepsiyasida alyans yetakchilari “yadro quroli mavjud bo‘lib turar ekan, NATO yadro ittifoqi bo‘lib qolishi”ni tasdiqlagan edi.