АҚШ Марказий разведка бошқармаси (МРБ) директори Уильям Бёрнс октябрь бошида Украинага келиб, президент Владимир Зеленский ва бир қатор украиналик мансабдорлар билан учрашган. Бу ҳақда CNN АҚШ маъмурияти вакилларига таяниб хабар бермоқда.
Телеканал манбасига кўра, ташриф чоғида Бёрнс «АҚШ Украинага унинг Россия тажовузига қарши курашида кўмак беришга, шу жумладан, разведка маълумотлари билан узлуксиз айирбошлашга содиқлигини тасдиқлаган». Бошқа тафсилотлар келтирилмаган.
CNN қайд этишича, сафар Россия Украинада ядро қуроли қўллаши мумкинлиги борасидаги хавотирлар фонида амалга ошган. Бёрнс ва АҚШ ҳукуматининг бошқа вакиллари Москванинг бундай қадамга тайёрланаётгани бўйича далилларни кўрмаётганини айтган бўлса-да, разведка маълумотларидан хабардор бўлган манбалар воқеаларнинг бундай тус олиши «хавфи юқори» экани ҳақида огоҳлантирмоқда. «Россия томонидан ядровий зарба хавфи у Украинага бостириб кирганидан буён, эҳтимол, энг юқори даражага етди», — деди улар.
Россия томони ҳеч кимга ядро қуролидан фойдаланиш билан таҳдид қилмаётганини кўп бора таъкидлаган. Politico маълумотларига кўра, Ғарб 21 сентябрдан кейин Россиянинг ядровий қурол-яроғлари устидан кузатувни кучайтирган. Ўша куни қисман сафарбарлик ҳақида эълон қилаётиб, президент Владимир Путин Ғарб «ядровий шантаж»дан фойдаланаётганини айтган ва Россияни ҳимоя қилиш учун «барча воситалар»ни ишга солиши ҳақида огоҳлантирганди.
Россия ҳукумати 23 октябрдан буён Украина «ифлос бомба»дан фойдаланиб провокациялар уюштиришга ва кеуин бунда Россияни айблашга тайёрланаётганини даъво қилмоқда.
CNN маълумотларига кўра, Бёрнс Украинага январда, Россия ҳарбий операцияси бошланишидан аввал ҳам келган. 2021 йил ноябрида эса Москвага бориб, Россия Хавфсизлик кенгаши котиби Николай Патрушев ва Ташқи разведка хизмати раҳбари Сергей Наришкин билан учрашган.
Изоҳ (0)