“O’zbekiston” emas “O‘zbekiston”. Toshkent shahar hokimligi qoshidagi Jamoatchilik kengashi iltimosi

Joriy yilning 21-oktabr sanasida o‘zbek tiliga davlat tili maqomi berilgan kun munosib nishonlandi.

Biroq o‘zbek tiliga bo‘lgan hurmatni bayram kunidagina ifoda etish to‘g‘rimi? Til haqidagi muammolar, takliflarni har doim muhokama qilish kerak emasmi? Shu sababdan Toshkent shahar hokimligi qoshidagi Jamoatchilik kengashi iltimosnoma bilan chiqdi.

Vatan sevgisi ona tiliga bo‘lgan hurmatdan boshlanadi. Har birimiz yurt nomi — “O‘zbekiston” so‘zini to‘g‘ri yozish orqali davlat tiliga muhim e’tibor qaratgan bo‘lamiz.

Gap “O‘zbekiston” nomidagi “O‘” harfini lotin yozuviga asoslangan o‘zbek alifbosida to‘g‘ri yozish haqida bormoqda. Afsuski, o‘zimiz matn terganimizda ham, peshlavha-yu, turli hujjatlarda xatoga yo‘l qo‘ymoqdamiz. Buning xavfli tomoni — yoshlar hamda kirill yozuviga o‘rgangan insonlar shunday yozilishi kerak ekan, degan fikrga kelishi mumkin.

Sizlardan iltimos,

• Kompyuterda lotin alifbosida “O‘” harfini to‘g‘ri yozish uchun quyidagi harakatlarni amalga oshiring:

komyuterning o‘ng tomondagi past burchagida tillarni belgilovchi tugmada ingliz tilini tanlang;

Word dasturida avval “O” harfini yozib, so‘ng Alt+0145 tugmalari birikmasini bosing. (Odatiy tarzda “O” harfini yozib, undan so‘ng apostrof (’) belgisini qo‘llash noto‘g‘ri hisoblanadi);

• Peshlavhalar, e’lonlar, turli joylarda davlatimiz nomi noto‘g‘ri yozilganiga duch kelsangiz, ushbu yozuv egalarini bu haqida xabardor qilishingizni so‘raymiz.
• Rasmiy hujjatlarda keltiriladigan “O‘zbekiston” nomi to‘g‘ri yozilishini ta’minlash davlat idoralari xodimlari tomonidan amalga oshirilishi zarur.

Toshkent shahar hokimligi qoshidagi Jamoatchilik kengashi