Qashqadaryo viloyatining Muborak tumanida ikki Lacetti to‘qnashishi oqibatida yong‘in chiqdi. Natijada avtomobillarda yo‘lovchi sifatida ketayotgan ikki kishi jarohat olib, shifoxonaga yotqizildi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, voqea 2022-yilning 26-oktabr kuni soat 11:20 da xalqaro ahamiyatga ega A-380 G‘uzor—Buxoro—Nekus—Beyneu avtomobil yo‘lining 108-kilometrida sodir bo‘lgan.
Muborak tumanidagi Gazni qayta ishlash zavodi ro‘parasida harakatlanib kelayotgan haydovchi T.D. boshqaruvidagi Lacetti-1 Qarshi—Muborak yo‘nalishida harakatlanib kelib, qarama-qarshi yo‘nalishiga chiqib ketib, ro‘parasidan chiqqan T.T. boshqaruvidagi Lacetti-2 ga urilgan. Oqibatda qisqa tutashuv sodir bo‘lib Lacetti-2 da yong‘in chiqqan. Avtomobil salonida yo‘lovchi sifatida kelayotgan fuqarolar U.A. hamda B.S.lar tan jarohati olib tuman markaziy shifoxonasiga yotqizilgan, — deydi viloyat IIB axborot xizmati rahbari Javlon Baxtiyev.
Qo‘shimcha qilinishicha, holat yuzasidan Muborak tuman IIB TB tomonidan tergovoldi surishtiruv ishlari olib borilmoqda.
Izoh (0)