Washington Post gazetasi Rossiya prezidenti Vladimir Putinga Ukraina bilan urushdagi xatolar haqida to‘g‘ridan to‘g‘ri gapirib bergan odamning ismini oshkor qildi, deb xabar beradi Meduza. Bu Yevgeniy Prigojin.
Oktabr oyi boshida The Washington Post gazetasi Amerika razvedkasi tomonidan qo‘lga kiritilgan ma’lumotlarga tayanib, Rossiya Federatsiyasi prezidentining atrofidagi shaxs Vladimir Putinga Ukrainadagi urushda yo‘l qo‘yilgan xatolar haqida to‘g‘ridan to‘g‘ri gapirganini yozgan edi. Keyinroq razvedka hisobotida Putin tanqid qilishga yo‘l qo‘ygan yaqin sherigining nomi ko‘rsatilgan, biroq bu jurnalistlarga ma’lum emasligi haqida aytilgandi.
Washington Post gazetasi razvedka hisobotida kim tilga olinganini aniqlashga muvaffaq bo‘ldi. AQSH hukumatidagi hisobotdan xabardor manbaning nashrga aytishicha, bu biznesmen, Wagner PMC asoschisi Yevgeniy Prigojindir.
Nashr manbasiga ko‘ra, Prigojin Rossiya Mudofaa vazirligi Wagner PMC zimmasiga haddan tashqari ko‘p majburiyatlarni yuklayotgani, shu bilan birga, xususiy harbiy kompaniya o‘z vazifalarini bajarishi uchun yetarli moliyaviy va moddiy resurslar ajratmayotganidan noroziligini bildirgan.
The Washington Post manbasining qayd etishicha, ijtimoiy tarmoqlarda Wagner PMC jangchilari oziq-ovqat va jihozlar yetishmasligidan shikoyat qilgan video tarqaldi. Manbaning aytishicha, video Kremlni yollanma askarlarga ko‘proq mablag‘ ajratishga majburlash uchun sahnalashtirilgan bo‘lishi mumkin.
Yevgeniy Prigojin esa Konkord kompaniyasi matbuot xizmati orqali The Washington Post nashriga u Putin bilan “yaqinda ham, yaqin kelajakda ham” shaxsan muloqotda emasligi, shuningdek, “Ukrainadagi mojaro paytida Rossiya Federatsiyasi Qurolli Kuchlari rahbariyatini tanqid qilmagani”ni ta’kidladi. Undan tashqari, Prigojin Wagner PMC jangchilari oziq-ovqat va materiallar yetishmasligidan shikoyat qilgan yozuvni ko‘rmaganligini aytdi.
Konkord kompaniyasi matbuot xizmati tomonidan e’lon qilingan sharhida Prigojin The Washington Post jurnalistlarini “Oshxonadagi g‘iybat va chayqovlarni yig‘adigan, shuningdek, bema’ni provokatsion va haqoratli savollarni nashr qilish orqali qandaydir ma’lumot maydoni yaratishga harakat qiladigan isterik bozor ayollariga o‘xshamaslikni” taklif qildi.
Izoh (0)