Rossiyaning 75 ta hududida qariyb 31 ming nafar erkak safarbarlik e’lon qilinganidan keyin zudlik bilan oila qurgan. Bu haqda “Mediazona” o‘z hisob-kitoblariga tayanib xabar berdi.
Qonunga muvofiq, alohida holatlarda, shu jumladan, chaqiruv qog‘ozi olingan hollarda ham, ariza berilgan kuni (bir oydan keyin emas) nikoh qayd ettirish mumkin. Safarbar etilgan shaxs yaralangan yoki halok bo‘lgan taqdirda, uning oila a’zolari tovon puliga, shuningdek, hududiy ma’muriyat ko‘magiga da’vogarlik qilishi mumkin.
39 ta hudud uchun “Mediazona” mahalliy hukumatlar, FHDYO yoki OAVlar tomonidan e’lon qilingan “tezlashtirilgan to‘ylar” haqidagi ma’lumotlardan foydalandi, 36 ta hudud uchun esa “ortiqcha” to‘ylar sonini sentabrdagi to‘ylar soni haqidagi ma’lumotlarga tayanib, o‘zi hisoblab chiqdi.
17 ta hudud FHDYOlari tomonidan taqdim etilgan ma’lumotlarga ko‘ra, oyning so‘nggi ikki haftasida (19—30-sentabr) nikohlar soni oshgan: masalan, Buryatiyada safarbarlikdan avval bir haftada o‘rtacha 83 ta to‘y o‘tkazilgan bo‘lsa, safarbarlik e’lon qilinganidan keyin ularning soni 662 taga yetgan.
“Mediazona” fikricha, ushbu ma’lumotlardan safarbar etilgan rossiyaliklarning umumiy sonini hisoblashda foydalanish mumkin, buning uchun ularni nikohsiz juft bo‘lib yashayotgan erkaklar soni haqidagi ma’lumotlar bilan qiyoslash kerak. Jurnalistlar hisob-kitoblariga ko‘ra, ushbu toifada safarbar etilgan erkaklarning o‘rtacha foizi 1,56% ga teng; demak, butun mamlakat bo‘ylab 492 ming kishi safarbar qilingan bo‘lishi mumkin.
Eslatib o‘tamiz, Rossiyada qisman safarbarlik 21-sentabr kuni e’lon qilindi va 300 ming kishi armiyaga chaqilishi ma’lum qilindi. 14-oktabr kuni allaqachon 222 ming kishi safarbar etilgani haqida xabar berildi.
Izoh (0)