Путинга Украина билан урушдаги хатолар ҳақида тўғридан-тўғри гапирган одамнинг исми ошкор қилинди

Washington Post газетаси Россия президенти Владимир Путинга Украина билан урушдаги хатолар ҳақида тўғридан-тўғри гапириб берган одамнинг исмини ошкор қилди, деб хабар беради Meduza. Бу Евгений Пригожин.

Октябрь ойи бошида The Washington Post газетаси Америка разведкаси томонидан қўлга киритилган маълумотларга таяниб, Россия Федерацияси президентининг атрофидаги шахс Владимир Путинга Украинадаги урушда йўл қўйилган хатолар ҳақида тўғридан-тўғри гапирганини ёзган эди. Кейинроқ разведка ҳисоботида Путин танқид қилишга йўл қўйган яқин шеригининг номи кўрсатилган, бироқ бу журналистларга маълум эмаслиги ҳақида айтилганди.

Washington Post газетаси разведка ҳисоботида ким тилга олинганини аниқлашга муваффақ бўлди. АҚШ ҳукуматидаги ҳисоботдан хабардор манбанинг нашрга айтишича, бу бизнесмен, Wagner PMC асосчиси Евгений Пригожиндир.

Нашр манбасига кўра, Пригожин Россия Мудофаа вазирлиги Wagner PMC зиммасига ҳаддан ташқари кўп мажбуриятларни юклаётгани, шу билан бирга, хусусий ҳарбий компания ўз вазифаларини бажариши учун етарли молиявий ва моддий ресурслар ажратмаётганидан норозилигини билдирган.

The Washington Post манбасининг қайд этишича, ижтимоий тармоқларда Wagner PMC жангчилари озиқ-овқат ва жиҳозлар етишмаслигидан шикоят қилган видео тарқалди. Манбанинг айтишича, видео Кремлни ёлланма аскарларга кўпроқ маблағ ажратишга мажбурлаш учун саҳналаштирилган бўлиши мумкин.

Евгений Пригожин эса Konkord компанияси матбуот хизмати орқали The Washington Post нашрига у Путин билан «яқинда ҳам, яқин келажакда ҳам» шахсан мулоқотда эмаслиги, шунингдек, «Украинадаги можаро пайтида Россия Федерацияси Қуролли Кучлари раҳбариятини танқид қилмагани»ни таъкидлади. Ундан ташқари, Пригожин Wagner PMC жангчилари озиқ-овқат ва материаллар етишмаслигидан шикоят қилган ёзувни кўрмаганлигини айтди.

Konkord компанияси матбуот хизмати томонидан эълон қилинган шарҳида Пригожин The Washington Post журналистларини «Ошхонадаги ғийбат ва чайқовларни йиғадиган, шунингдек, бемаъни провокацион ва ҳақоратли саволларни нашр қилиш орқали қандайдир маълумот майдони яратишга ҳаракат қиладиган истерик бозор аёлларига ўхшамасликни» таклиф қилди.