Fransiya prezidenti Emmanuel Makron Rim papasi Fransiskdan Rossiya rahbari Vladimir Putinni, Moskva va butun Rossiya patriarxi Kirillni hamda Amerika yetakchisi Jo Baydenni Ukrainada “sulh jarayonini qo‘llash”ga chaqirishni so‘ragan. Bu haqda u Vatikanda pontifik bilan uchrashuvdan keyin ma’lum qilgan.
“Papa Fransiskni Vladimir Putinga va Moskva patriarxi Kirillga, shuningdek, Jo Baydenga qo‘ng‘iroq qilishga chaqirdim”, — dedi Makron.
“AQSH Ukrainada yarashuvga erishishni qo‘llab-quvvatlash uchun muzokaralar stoliga o‘tirishi zarur — bizga shu narsa kerak”, — dedi Fransiya prezidenti.
Uning so‘zlariga ko‘ra, Bayden va Rim papasi o‘rtasida “haqiqiy ishonchli munosabatlar” bor va u Baydenga ta’sir o‘tkazishi mumkin.
Makron Vatikanga 24-oktabr kuni tashrif buyurdi va papa Fransisk bilan uchrashdi. Ular dunyoda, “ayniqsa, Ukrainada tinchlikka erishishda ko‘maklashish”ni muhokama qildi.
Rossiyaning Ukrainaga bosqini boshlanganidan buyon Makron Putin bilan eng ko‘p muloqot qilgan xorijiy yetakchilardan biri hisoblanadi. 21-sentabr kuni Putin qisman safarbarlik e’lon qilganidan keyin Makron uning ushbu qarorini qoraladi.
“Urushni to‘xtatish uchun hamma Putinga maksimal bosim o‘tkazishi kerak. Uning safarbarlik qarori xato, bu rus xalqi uchun yomon yangilik bo‘ldi”, — degan Fransiya rahbari BMT Bosh assambleyasidagi nutqida.
Avvalroq Rim papasi Rossiya va Ukraina prezidentlariga murojaat yo‘llab, Putindan zo‘ravonlik va o‘limlarni to‘xtatishni, Zelenskiydan esa tinchlik bo‘yicha jiddiy takliflarga ochiq bo‘lishni so‘ragan edi.
Izoh (0)