Rishi Sunak rasman Britaniyaning yangi, 57-bosh vaziri etib tayinlandi, deb xabar bermoqda BBC News.
25-oktabr kuni tushdan keyin Sunak qirol Charlz III bilan uchrashdi. Qirol undan yangi hukumat tuzishni so‘radi.
Undan oldin Charlz III Bukingem saroyida sobiq bosh vazir Liz Trassning iste’fosini qabul qilgan.
Sobiq moliya vaziri, 42 yoshli Rishi Sunak Buyuk Britaniyaning so‘nggi ikki asrdagi eng yosh bosh vaziri bo‘ldi.
Uch yil davomida Britaniya bosh vaziri lavozimini egallab kelgan Boris Jonson 2022-yil iyul oyida, qator janjallardan so‘ng iste’foga chiqqan edi. Sentabr boshida Konservatorlar partiyasi yangi saylovlar o‘tkazdi, unda o‘sha paytda Britaniya Tashqi ishlar vazirligini boshqargan Liz Trass g‘alaba qozondi. Bosh vazir sifatida Trass nomaqbul iqtisodiy islohotlarni taklif qildi va 45 kundan keyin iste’foga chiqishga majbur bo‘ldi.
Konservatorlar partiyasi rahbari uchun navbatdagi saylov 24-oktabrga belgilangan edi, ammo u o‘tkazilmadi, chunki Rishi Sunak bosh vazirlikka yagona nomzod bo‘lib qoldi. Ovoz berishdan biroz oldin, asosiy raqib, Jamoatlar palatasi rahbari Penni Mordont Sunakni qo‘llab-quvvatlab, o‘z nomzodini qaytarib oldi.
Rishi Sunak ilk bor 2015-yilda Buyuk Britaniyaning Jamoatlar palatasiga saylangan. Uch yildan so‘ng u Tereza Mey hukumatida vazir yordamchisi lavozimini egallagan. 2019-yil iyul oyida u Boris Jonson hukumatida Britaniya G‘aznachiligining bosh kotibi etib tayinlandi. 2020-yil fevral oyida esa Sunak Britaniya moliya vaziri bo‘ldi.
Izoh (0)