“Huquqiy baho beriladi” — Putin safarbarlik e’lon qilinganidan keyin Rossiyani tark etgan fuqarolar haqida gapirdi (video)

Rossiya prezidenti Vladimir Putin qisman safarbarlik boshlanganidan beri mamlakatni tark etgan fuqarolar haqida gapirdi.

Men emotsional emas, balki huquqiy baho berishni ma’qul ko‘raman. Har bir aniq holatda u yoki bu fuqaroning harakatlariga huquqiy baho beriladi. Kimdir nimadandir qo‘rqib ketdi, kimdir safarbarlikdan qochishni xohlamoqda, yana kimdir boshqa sabab bilan. Har bir aniq holatda huquqiy baho berish va aniq bir shaxsga nisbatan faqat shu asosda ish ko‘rish kerak. Menimcha, boshqachasi bo‘lmaydi, — dedi Putin Ostonadagi matbuot anjumanida.

Putinning aytishicha, qisman safarbarlik doirasida 222 ming kishi harbiy xizmatga chaqirilgan va barcha safarbarlik tadbirlari ikki hafta ichida yakunlanadi.

Uning so‘zlariga ko‘ra, avvalroq u aytib o‘tgan safarbarlik bilan bog‘liq “tartibsizliklar” o‘n yilliklar davomida yangilanmagan eski hisob shakllari tufaylidir. Endi axborot bazasi yangilanmoqda, ma’lumot maksimal darajada ishonchli bo‘ladi, dedi u.

Rossiya prezidenti, shuningdek, safarbar etilganlarning barchasi majburiy tayyorgarlikdan o‘tishi kerakligini ta’kidladi.

Ayni paytda safarbar qilinganlarning 16 ming nafari jangovar topshiriqlarni bajarish uchun jalb etiladigan bo‘linmalarga joylashtirilgan, dedi u.

Avvalroq Rossiya hukumati birinchi marta safarbar qilinganlar frontda halok bo‘lgani haqida xabar bergandi.