Tarixdagi birinchi kosmik sayyoh Dennis Tito va uning rafiqasi Akiko Ilon Maskning SpaceX kemasida Oy atrofida parvoz qiladi, deb xabar bermoqda Bloomberg.
Ulardan tashqari yana taxminan o‘n nafar yo‘lovchini o‘z ichiga oluvchi sayohat qariyb bir hafta davom etadi. Parvoz Oyga qo‘nishni o‘z ichiga olmaydi. Boshqa yo‘lovchilarning ism-shariflari, parvoz sanasi va narxi hozircha oshkor etilmayapti.
SpaceX kompaniyasi Oyga missiya uchun foydalanishni rejalashtirayotgan Starship kosmik kemasi birorta ham orbital parvozni amalga oshirganicha yo‘q. Ilon Maskning so‘zlariga ko‘ra, sayyohlarni koinotga jo‘natishdan avval kompaniya kemani sinovdan o‘tkazib, koinotda uni yonilg‘i bilan to‘ldirish mumkinligiga ishonch hosil qilishi va odamlar hayotini ta’minlash uchun zarur qurilmalar bilan jihozlashi kerak. Maskning aytishicha, sinov parvozi noyabrda amalga oshirilishi mumkin.
“Bu raketani har taraflama sinab ko‘rishlarini bilaman. Biz uchishimizdan avval u yuzlab parvozlarni amalga oshiradi, — dedi Dennis Tito Bloomberg nashriga bergan intervyusida. — Biz kelasi yil uchmaymiz. Biroz kutishimizga to‘g‘ri keladi”.
2002-yilda milliarder Ilon Mask tomonidan asos solingan SpaceX kompaniyasi o‘tgan yili kosmik turizm bozoriga kirib keldi. 2021-yilda to‘liq oddiy fuqarolardan iborat bo‘lgan ekipaj SpaceX Crew Dragon kemasida Inspiration4 missiyasi doirasida uch kun orbitada bo‘lib qaytdi, ushbu missiyani milliarder Jared Ayzekmen moliyalashtirdi. 2022-yil aprelida kompaniya birinchi marta Xalqaro koinot stansiyasiga xususiy ekipajni yubordi.
Wilshire Associates investitsiya kompaniyasi asoschilaridan biri Dennis Tito 2001-yilda koinotga sayyoh sifatida parvoz qilgandi, o‘shanda u Yerga yaqin orbitaga parvoz uchun 20 million dollar to‘lagan, “Soyuz TM-32” kemasi ekipaji u yerda olti kun bo‘lib qaytgandi. Bu vaqt davomida Tito Yerni 128 marta aylanib uchgan. Hozir u 82 yoshda, demak u koinotga uchgan eng keksa odamga aylanadi. Uning rafiqasi Akiko 57 yoshda bo‘lib, ular ikkalasi ham uchuvchilardir.
Eslatib o‘tamiz, 2021-yilning 20-iyul kuni Jeff Bezos koinotda bo‘lib qaytgandi. Bortida Bezos va yana uch nafar odam bo‘lgan New Shepard havo kemasi kosmosga chiqib muvaffaqiyatli qo‘nishni amalga oshirdi. New Shepard kapsulasi kosmodromdan uchgach, taxminan, 350 ming funt masofani bosib o‘tdi, Yer atmosferasini fazodan ajratib turuvchi Karmana chizig‘idan (Yerdan 100 kilometr uzoqlikda) o‘zgan holda koinotga chiqdi. Parvoz taxminan 11 daqiqa davom etgan. AQSh koinotga parvoz qilgan milliarderlar Brenson va Bezosni astronavt deb tan olmagan.
Izoh (0)