Тарихдаги биринчи космик сайёҳ Деннис Тито ва унинг рафиқаси Акико Илон Маскнинг SpaceX кемасида Ой атрофида парвоз қилади, деб хабар бермоқда Bloomberg.
Улардан ташқари яна тахминан ўн нафар йўловчини ўз ичига олувчи саёҳат қарийб бир ҳафта давом этади. Парвоз Ойга қўнишни ўз ичига олмайди. Бошқа йўловчиларнинг исм-шарифлари, парвоз санаси ва нархи ҳозирча ошкор этилмаяпти.
SpaceX компанияси Ойга миссия учун фойдаланишни режалаштираётган Старшип космик кемаси бирорта ҳам орбитал парвозни амалга оширганича йўқ. Илон Маскнинг сўзларига кўра, сайёҳларни коинотга жўнатишдан аввал компания кемани синовдан ўтказиб, коинотда уни ёнилғи билан тўлдириш мумкинлигига ишонч ҳосил қилиши ва одамлар ҳаётини таъминлаш учун зарур қурилмалар билан жиҳозлаши керак. Маскнинг айтишича, синов парвози ноябрда амалга оширилиши мумкин.
«Бу ракетани ҳар тарафлама синаб кўришларини биламан. Биз учишимиздан аввал у юзлаб парвозларни амалга оширади, — деди Деннис Тито Bloomberg нашрига берган интервьюсида. — Биз келаси йил учмаймиз. Бироз кутишимизга тўғри келади».
2002 йилда миллиардер Илон Маск томонидан асос солинган SpaceX компанияси ўтган йили космик туризм бозорига кириб келди. 2021 йилда тўлиқ оддий фуқаролардан иборат бўлган экипаж SpaceX Crew Dragon кемасида Inspiration4 миссияси доирасида уч кун орбитада бўлиб қайтди, ушбу миссияни миллиардер Жаред Айзекмен молиялаштирди. 2022 йил апрелида компания биринчи марта Халқаро коинот станциясига хусусий экипажни юборди.
Wилшире Ассоcиатес инвестиция компанияси асосчиларидан бири Деннис Тито 2001 йилда коинотга сайёҳ сифатида парвоз қилганди, ўшанда у Ерга яқин орбитага парвоз учун 20 миллион доллар тўлаган, «Союз ТМ-32» кемаси экипажи у ерда олти кун бўлиб қайтганди. Бу вақт давомида Тито Ерни 128 марта айланиб учган. Ҳозир у 82 ёшда, демак у коинотга учган энг кекса одамга айланади. Унинг рафиқаси Акико 57 ёшда бўлиб, улар иккаласи ҳам учувчилардир.
Эслатиб ўтамиз, 2021 йилнинг 20 июль куни Жефф Безос коинотда бўлиб қайтганди. Бортида Безос ва яна уч нафар одам бўлган New Shepard ҳаво кемаси космосга чиқиб муваффақиятли қўнишни амалга оширди. New Shepard капсуласи космодромдан учгач, тахминан, 350 минг фунт масофани босиб ўтди, Ер атмосферасини фазодан ажратиб турувчи Кармана чизиғидан (Ердан 100 километр узоқликда) ўзган ҳолда коинотга чиқди. Парвоз тахминан 11 дақиқа давом этган. АҚШ коинотга парвоз қилган миллиардерлар Бренсон ва Безосни астронавт деб тан олмаган.
Изоҳ (0)