BMT Bosh assambleyasi Ukraina hududlarining Rossiya tomonidan bosib olinishini qoralovchi rezolyutsiyani qabul qildi. O‘zbekiston betaraf qoldi

BMT Bosh assambleyasi Donetsk va Lugansk xalq respublikalarida hamda bosib olingan Xerson va Zaporojye viloyatlarida Rossiya tomonidan o‘tkazilgan “referendumlar”ni qoralovchi rezolyutsiyani qabul qildi, deb yozadi Meduza. Hujjat, shuningdek, Rossiyaga nisbatan Ukraina hududlarining qo‘shib olinish haqidagi arizalarini qayta ko‘rib chiqish talabini ham o‘z ichiga oladi.

BREAKING

The UN General Assembly adopted a resolution that condemns #Russia's "illegal so-called referendums" in regions within #Ukraine's internationally-recognized borders, and demands it reverses its annexation declaration.

In favour: 143

Against: 5

Abstentions: 35 pic.twitter.com/MDDIapqTGv

— UN News (@UN_News_Centre) October 12, 2022

BMTga a’zo 193 ta mamlakatdan 143 tasi rezolyutsiyani yoqlab ovoz berdi. Beshta mamlakat — Belarus, Shimoliy Koreya, Nikaragua, Suriya va Rossiya qarshi chiqdi. Ovoz berishda 35 ta davlat betaraf qoldi, ular orasida Xitoy, Hindiston, O‘zbekiston, Qirg‘iziston, Qozog‘iston va Tojikiston ham bor. Yana o‘nta davlat esa ovoz berishda qatnashmadi.

Vladimir Putin Kremlda DXR va LXR, shuningdek, Xerson va Zaporojye viloyatlarining “Rossiyaga qo‘shilishi” haqidagi shartnomalarni imzolagan 30-sentabr kuniyoq BMT Xavfsizlik kengashi “referendumlar”ni qoralab ovoz berishga uringandi, biroq o‘shanda Rossiya delegatsiyasi tegishli rezolyutsiya loyihasiga veto qo‘ygandi.

23—27-sentabr kunlari Zaporojye viloyatida, LXR, DXR va Xerson viloyatlarida bo‘lgani kabi, Rossiya tarkibiga kirish haqida referendum bo‘lib o‘tdi. 30-sentabr kuni Kremlda hududlarning qo‘shilishi to‘g‘risidagi shartnomalarni imzolash marosimi o‘tkazildi. 2-oktabr kuni ular, tartib bo‘yicha, Konstitutsiyaviy sud tomonidan ma’qullandi. 3 va 4-oktabr kunlari shartnomalarni hamda qo‘shilish haqidagi federal konstitutsiyaviy qonunlarni Davlat dumasi va Federatsiya kengashi qo‘llab-quvvatladi. 5-oktabr kuni esa prezident imzosi qo‘yilgan shartnomalarni Kreml e’lon qildi.

BMT bosh kotibi DXR, LXR hamda Xerson va Zaporojye viloyatlarining Rossiya qo‘shinlari nazorati ostidagi qismlari Rossiya tarkibiga kirishi yuridik kuchga ega bo‘lmasligini aytgandi.

Avvalroq Rossiya ovoz berishni yashirincha o‘tkazishni taklif qilgandi, bunday tashabbus bilan mamlakatning tashkilotdagi doimiy vakili Vasiliy Nebenzya chiqqan. BMT Bosh assambleyasida ovoz berishni ochiqcha o‘tkazishda qaror qilishgach, u Rossiya tomonidan qat’iy norozilikni bildirdi.