Qirg‘iziston jamoatchiligi Tojikiston bilan yaqinda bo‘lib o‘tgan ziddiyat tufayli, Kollektiv xavfsizlik shartnomasi tashkiloti (KXSHT)ning “Mustahkam birodarlik-2022” mashg‘ulotlarida armiyaning ishtirokini ma’qullamagan bo‘lardi, shuning uchun o‘quv mashqlarini bekor qilishga to‘g‘ri kelgan. Bu haqda Qirg‘iziston Vazirlar mahkamasi raisi o‘rinbosari Edil Baysalov “RIA Novosti”ga ma’lum qildi.
Uning so‘zlariga ko‘ra, “KXSHTga a’zolik mutlaqo buzilmasdir”:
“Bizda ushbu tashkilotga nisbatan hech qanday muammolar yo‘q, mandat bilan ham, missiya bilan ham, ustav bilan ham — hech qanaqa. Lekin, albatta, so‘nggi vaqtlarda yuz bergan voqealar fonida hali qonimiz sovimadi”, — dedi Baysalov gap “tojik qo‘shnilar” bilan harbiy to‘qnashuvlar haqida borayotganiga aniqlik kiritib.
“Ularsiz (Tojikistonsiz) esa bo‘lmaydi, ‘sizlar kelmanglar, qozoqlar, ruslar, belaruslar esa, sizlar kelinglar’ deb bo‘lmaydi. Bunaqa bo‘lishi mumkin emas, shu sababli ishtirokimizni bekor qilishga to‘g‘ri keldi, va KXSHTning barcha poytaxtlarida bizni mutlaqo tushunishdi. Shunga qaramay, biz bu noto‘g‘ri talqin qilinishidan xavotirdamiz, bu boradagi taxminlar esa butunlay mas’uliyatsizlikdir”, — deya xulosa qildi u.
Avvalroq Bishkek Kollektiv xavfsizlik shartnomasi tashkiloti (KXSHT) harbiy mashg‘ulotlarida qatnashishdan bosh tortgani haqidagi xabarlar fonida Rossiya Tashqi ishlar vazirligiga Qirg‘iziston elchisi Gulnara-Klara Samat chaqirilgani xabar berildi.
Qirg‘iziston KXSHT mashg‘ulotlarini bekor qildi
Eslatib o‘tamiz, Qirg‘iziston Mudofaa vazirligi KXSHT tinchlikparvar kuchlari bilan “Mustahkam birodarlik – 2022” qo‘mondonlik-shtab o‘quv mashg‘ulotlarini bekor qildi. O‘quv mashg‘ulotlari 10—14-oktabr kunlari Issiqko‘l viloyatining Baliqchi shahrida bo‘lib o‘tishi kerak edi. Ularni kuzatish uchun O‘zbekiston, Serbiya, Suriya, Turkmaniston va Mo‘g‘ulistondan vakillar taklif qilingandi. Mashg‘ulotlar doirasida o‘t ochishni to‘xtatish rejimini ta’minlash masalalarini ishlab chiqish rejalashtirilgan edi.Ekspertlar bunga yaqinda Tojikiston bilan chegarada yuz bergan qurolli nizoni sabab qilib keltirmoqda, shu sababli Bishkek o‘z hududida tojikistonlik harbiylarni qabul qilishni va ular bilan hamkorlikda mashg‘ulotlar o‘tkazishni istamayapti, dedi ular. Ayni vaqtda, voqea Bishkek va Moskva o‘rtasidagi aloqalarga ta’sir qilishi amri maholligi aytilmoqda. Biroq Qirg‘iziston prezidenti Sadir Japarov 7-oktabr kuni rossiyalik hamkasbi Vladimir Putinning yubileyiga kelmagani e’tibordan chetda qolmagan.
Chegaradagi ziddiyat
Tojikiston va Qirg‘iziston chegarasidagi katta ko‘lamli jangovar to‘qnashuvlar 14—17-sentabr kunlari sodir bo‘ldi. Tomonlar haligacha bir-birini otishmalarda ayblamoqda.Qirg‘iziston to‘qnashuvlar natijasida 62 nafar fuqarosi halok bo‘lib, 198 nafari jabrlanganini ma’lum qildi. Tojikiston esa rasman 41 nafar qurbon va 30 nafar yarador haqida bayonot berdi.
25-sentabr kuni ikki mamlakat vakillari vaziyatni tartibga solish haqida bayonnoma imzolab, chegaradagi nizoni to‘xtatishga hamda uni delimitatsiya va demarkatsiya qilish jarayonini tezlashtirishga kelishib oldi.
Izoh (0)