Daniyalik olimlar tadqiqot o‘tkazib, dunyodagi ko‘k ko‘zli odamlarning barchasi taxminan 6—10 ming yil avval yashab o‘tgan bir odamning avlodlari, degan xulosaga keldi. Bu haqda LADBible xabar bermoqda.
Olimlar qayd etishicha, Yer aholisining bor-yo‘g‘i 10 foizi ko‘k ko‘z sohiblaridir. Ko‘p yillar davomida tadqiqotchilar inson ko‘zidagi jigarrang pigment darajasini belgilovchi OCA2 genini o‘rgangan. Yakunda esa ko‘z rangdor pardasining ko‘k rangda bo‘lishi — ko‘k pigmentni qo‘shuvchi HERC2 genidan kelib chiqqan genetik mutatsiya oqibati, degan xulosaga keldi.
Shuningdek, olimlar bu mutatsiya taxminan 6—10 ming yil avval yashab o‘tgan bitta odamdan kelib chiqqanini aniqladi.
“Ko‘k ko‘zli odamlarning barchasi yagona ajdod orqali bog‘langan. Ularning hammasi o‘z DNKsining bitta joyida bir xil mutatsiyani meros qilib olgan”, — dedi tadqiqot muallifi, hujayralar va molekulalar tibbiyoti bo‘limi professori Xans Ayberg.
Olimlar fikriga ko‘ra, mutatsiya odamlar Afrikadan Yevropaga migratsiya qilgan paytda tarqalgan bo‘lishi mumkin, bu esa asosan yevropoid irqiga mansub odamlarning ko‘zi ko‘k bo‘lishini qaysidir darajada tushuntirib beradi.
Izoh (0)