Belgiyada Sciensano jamiyat salomatligi instituti koronavirus pandemiyasining yangi to‘lqini vujudga kelganini tasdiqladi, deb yozadi “Interfaks”.
Virusolog Stefan van Guxt hisob-kitoblariga ko‘ra, kasallanish to‘lqini o‘tgan haftada boshlangan, o‘shanda kunlik kasallanish holatlari 26 foizga, kasalxonaga yotqizish holatlari esa 28 foizga ko‘paygan.
Sciensano yangi to‘lqin kuzatilishini ikki hafta avvalroq bashorat qilgandi, u oktabr o‘rtalarida avjiga chiqishi kutilmoqda.
Bemorlarning 92,3 foizida Omicron BA.5 shtammi qayd etilmoqda.
Fransiyada mutaxassislar koronavirus bilan kasallanish ko‘payishi tufayli, niqob rejimini qaytarishni muhokama qilmoqda. Bu haqda Sanitar xavflar ustidan nazorat qo‘mitasi raisi, immunolog Brijit Otran ma’lum qildi.
“Barcha ko‘rsatkichlar o‘smoqda: musbat testlar, kasalxonaga yotqizishlar soni, shifoxonalar qabulxonalariga tashriflar, hatto reanimatsiya bo‘linmalarida bemorlar soni oshmoqda. Ya’ni, ha, bu — sakkizinchi to‘lqin, — dedi u. — Haqiqatan ham, niqob taqish kerak”.
Bundan qariyb bir oy avval xalqaro ekspertlar, olimlar, jumladan, Jahon sog‘liqni saqlash tashkiloti rahbari Tedros Gebreyesus kuz mavsumi boshlanishi bilan dunyoda koronavirus infeksiyasi keskin avj olishidan jiddiy tashvishda edi. Ammo o‘tgan haftada koronavirusdan o‘lim ko‘rsatkichi 18 foizga kamaydi.
Avvalroq AQSH prezidenti Jo Bayden COVID-19 pandemiyasi tugaganini aytgan, ammo mamlakatda virus bilan bog‘liq “muammo” hamon saqlanib qolayotganini tan olgandi.
Shuningdek, Jahon sog‘liqni saqlash tashkiloti bosh direktori Tedros Adxanom Gebreyesus COVID-19 pandemiyasining nihoyasi yaqinligini aytgandi.
Izoh (0)