Инсон ҳуқуқларини ҳимоя қилиш бўйича ташкилотлар вакиллари Туркия президенти Ражаб Тоййиб Эрдўғонга очиқ мурожаат йўллаб, ундан Туркманистон фуқаролари учун визасиз режимни қайтаришни сўради.
2022 йилнинг 13 сентябрь куни Анқара Туркманистон илтимосига кўра ушбу давлат фуқароларининг Туркияга кириши учун виза режимини жорий қилганди. Шу тариқа, Туркия Вазирлар кенгашининг 2007 йил 19 июлдаги қарори бекор қилинди, унга мувофиқ туркманистонликлар Туркияда 30 кунгача туристик мақсадларда визасиз юриши мумкин эди.
Ҳуқуқ ҳимоячилари ўз мурожаатларида визасиз режимнинг бекор қилинишини «Туркманистон фуқароларининг эркин ҳаракатланиш ҳуқуқини камситиш» ва «Туркия республикаси ташқи сиёсатининг муҳим қисми бўлган турк халқларининг очиқлиги ва бирлашуви тамойилларини бузиш» деб атади.
Аслида Туркманистон Туркия ҳисобидан юз минглаб туркманларнинг мамлакатдан чиқиб кетишини тақиқлаб, ўз фуқароларига нисбатан репрессив сиёсатга Туркия республикасини жалб қилди.Қайд этилишича, айни пайтда Туркияда 230 мингга яқин қонуний истиқомат қилувчи туркманлар бор. Туркманистондан меҳнатга лаёқатли аҳолининг чиқиб кетишини тўхтатиш учун расмийлар турли чоралар кўрмоқда, жумладан, уларнинг мамлакатдан чиқиб кетишини суд қарорисиз чекламоқда.Туркманистон президентларининг иқтисодни якка тартибда ва саводсизларча бошқариши, уларнинг чексиз бойиб кетиши ва улкан коррупцияси чуқур иқтисодий инқирозга ва Туркманистон аҳолисининг оммавий қашшоқлашишига олиб келди. Жаҳон даражасидаги йирик углеводород ресурсларига эга ушбу мамлакатда шаҳарларда ўртача иш ҳақи бор-йўғи 70 доллар, ўртача пенсия эса 27 долларни ташкил қилади. Мамлакатда, айниқса, қишлоқ жойларида ишсизлик катта ва давосиз дардга айланди. Бу шундоқ ҳам рекорд даражада паст бўлган аҳоли турмуш даражасининг янада пасайишига олиб келмоқда. Очлик кам таъминланган Туркманистон фуқароларининг тобора кўпроқ қатламини қамраб олмоқда.
Туркманистонлик меҳнат муҳожирларининг аксарияти тирик қолиш ва оилаларини боқиш учун Туркияга кўчиб кетишни афзал кўрарди. Туркия туркманлар учун қардош мамлакат, халқларимизни нафақат тил ва менталитетнинг яқинлиги, балки муштарак тарихий илдизлар ҳам бирлаштиради. Туркманистондаги иқтисодий вазиятнинг ёмонлашуви Туркияга меҳнат миграцияси ортишига сабаб бўлмоқда, — дейилади ҳуқуқ ҳимоячиларининг мурожаатида.
Туркия томонидан виза режими жорий этилиши Туркманистон фуқароларининг ўз мамлакатидан ташқарига чиқишига қўшимча чеклов бўлди. Шу муносабат билан ҳуқуқ ҳимоячилари Эрдўғондан Туркманистон фуқаролари учун виза режимини бекор қилишни сўради.
Мурожаат Нидерландия ва Болгарияда яшовчи туркманистонликлар ҳуқуқларини ҳимоя қилишга ихтисослашган ҳуқуқ ҳимоячилари томонидан имзоланган.
Изоҳ (0)