Bosh prokuratura huzuridagi departament organlari tomonidan banklarning komplayens-nazorati tuzilmalari bilan hamkorlik doirasida pul mablag‘larining talon-toroj qilinishi bo‘yicha bir qator qonunbuzilish holatlari aniqlandi.
Xususan, departamentning Toshkent shahri Uchtepa tuman bo‘limi tomonidan o‘tkazilgan tergovga qadar tekshiruvda, “B.T.” MCHJ rahbari A.N. va boshqalar kredit ta’minoti sifatida MCHJga qarashli 7 ta maxsus texnikalar mavjudligi va taqiqda emasligi haqida soxta ma’lumotnomalar tayyorlab, bank muassasasidan 2,5 milliard so‘m kredit ajratilishiga erishib, ushbu mablag‘larni o‘zlashtirish yo‘li bilan talon-toroj qilganliklari aniqlangan.
Departamentning Qashqadaryo viloyati Dehqonobod tuman bo‘limi tomonidan o‘tkazilgan tergovga qadar tekshiruvda, “M.P.” xususiy korxonasi rahbari S.X. tijorat banki filialidan naslli chorva mollarini sotib olish uchun 100 ming dollar kredit ajratilishga erishib, hujjatlarni qalbakilashtirish orqali chorva mollarni boshqa shaxslarga sotib yuborib, juda ko‘p miqdordagi kredit mablag‘ini o‘zlashtirish va rastrata qilish yo‘li bilan talon-toroj qilgani aniqlangan.
Shu kabi, departamentning Namangan viloyati Pop tuman bo‘limi tomonidan o‘tkazilgan tergovga qadar tekshiruvda, “J.I.” MCHJ rahbari B.A. hududiy tijorat banki filiali sobiq boshqaruvchisi M.O. bilan o‘zaro til biriktirib, bank filialidan maxsus texnikalar sotib olish uchun ajratilgan 980 million so‘m kreditning garov ta’minotini to‘liq ta’minlamasdan, maxsus texnikalarni boshqa shaxslarga sotib yuborib, kredit mablag‘ini o‘zlashtirish yo‘li bilan talon-toroj qilgani aniqlangan.
Departamentning Andijon viloyati Izboskan tuman bo‘limi tomonidan o‘tkazilgan tergovga qadar tekshiruvda, “B.B.” MCHJ rahbari B.Q. va boshqalar tijorat banki filialidan ekskavator xarid qilish uchun ajratilgan 845 million so‘m kredit mablag‘ini o‘zlashtirish yo‘li bilan talon-toroj qilgani aniqlangan.
Departamentning Samarqand viloyati Toyloq tuman bo‘limi tomonidan o‘tkazilgan tergovga qadar tekshiruvda esa, fuqaro I.Ya. bank muassasasi mas’ul xodimlari bilan oldindan o‘zaro til biriktirib, “S.M.” MCHJga 800 million so‘m kredit ajratilishiga erishib, ushbu mablag‘larni soxta monitoring dalolatnomalari tuzish orqali “R.T.” MCHJga uskuna olish uchun o‘tkazish yo‘li bilan talon-taroj qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)