Бош прокуратура ҳузуридаги департамент органлари томонидан банкларнинг комплаенс-назорати тузилмалари билан ҳамкорлик доирасида пул маблағларининг талон-торож қилиниши бўйича бир қатор қонунбузилиш ҳолатлари аниқланди.
Хусусан, департаментнинг Тошкент шаҳри Учтепа туман бўлими томонидан ўтказилган терговга қадар текширувда, «Б.Т.» МЧЖ раҳбари А.Н. ва бошқалар кредит таъминоти сифатида МЧЖга қарашли 7 та махсус техникалар мавжудлиги ва тақиқда эмаслиги ҳақида сохта маълумотномалар тайёрлаб, банк муассасасидан 2,5 миллиард сўм кредит ажратилишига эришиб, ушбу маблағларни ўзлаштириш йўли билан талон-торож қилганликлари аниқланган.
Департаментнинг Қашқадарё вилояти Деҳқонобод туман бўлими томонидан ўтказилган терговга қадар текширувда, «М.П.» хусусий корхонаси раҳбари С.Х. тижорат банки филиалидан наслли чорва молларини сотиб олиш учун 100 минг доллар кредит ажратилишга эришиб, ҳужжатларни қалбакилаштириш орқали чорва молларни бошқа шахсларга сотиб юбориб, жуда кўп миқдордаги кредит маблағини ўзлаштириш ва растрата қилиш йўли билан талон-торож қилгани аниқланган.
Шу каби, департаментнинг Наманган вилояти Поп туман бўлими томонидан ўтказилган терговга қадар текширувда, «Ж.I.» МЧЖ раҳбари Б.А. ҳудудий тижорат банки филиали собиқ бошқарувчиси М.О. билан ўзаро тил бириктириб, банк филиалидан махсус техникалар сотиб олиш учун ажратилган 980 миллион сўм кредитнинг гаров таъминотини тўлиқ таъминламасдан, махсус техникаларни бошқа шахсларга сотиб юбориб, кредит маблағини ўзлаштириш йўли билан талон-торож қилгани аниқланган.
Департаментнинг Андижон вилояти Избоскан туман бўлими томонидан ўтказилган терговга қадар текширувда, «Б.Б.» МЧЖ раҳбари Б.Қ. ва бошқалар тижорат банки филиалидан экскаватор харид қилиш учун ажратилган 845 миллион сўм кредит маблағини ўзлаштириш йўли билан талон-торож қилгани аниқланган.
Департаментнинг Самарқанд вилояти Тойлоқ туман бўлими томонидан ўтказилган терговга қадар текширувда эса, фуқаро I.Я. банк муассасаси масъул ходимлари билан олдиндан ўзаро тил бириктириб, «С.М.» МЧЖга 800 миллион сўм кредит ажратилишига эришиб, ушбу маблағларни сохта мониторинг далолатномалари тузиш орқали «Р.Т.» МЧЖга ускуна олиш учун ўтказиш йўли билан талон-тарож қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)