Sirdaryo viloyatining Yangiyer shahriga Otabek Nosirov hokim etib tayinlandi. Bu haqda viloyat hokimligi matbuot xizmati xabar berdi.
Ma’lum qilinishicha, xalq deputatlari Yangiyer shahar kengashining 28-sentabr kuni bo‘lib o‘tgan navbatdan tashqari sessiyasida 2019-yildan buyon Sirdaryo viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelgan Otabek Nosirov Yangiyer shahar hokimi lavozimiga tayinlangan.
Shaharning avvalgi hokimi Elyor Xo‘jayev betoblik tufayli 2022-yilning iyulida vafot etgandi.
Otabek Nosirov 1976-yilda tug‘ilgan, ma’lumoti oliy. 1999-yilda Jizzax politexnika institutini, 2007-yilda O‘zbekiston Respublikasi Prezidenti huzuridagi davlat va jamiyat qurilishi akademiyasini tamomlagan.
“Otabek Nosirov viloyat hokimi o‘rinbosari sifatida faoliyat yuritgan davrida bir qator ijobiy ishlar amalga oshirdi. To‘plagan ish tajribasi orqali Yangiyer shahrining drayver yo‘nalishlarini yaxshi biladi, shaharni ijtimoiy-iqtisodiy rivojlantirish bo‘yicha astoydil mehnat qiladi, degan umiddamiz”, — deya ishonch bildirgan viloyat hokimi G‘ofurjon Mirzayev.
“Rahbarga eng avvalo xalq baho beradi. Elyor Xo‘jayev ham yomon faoliyat olib bormadi. Shaharni obodonlashtirish, aholining turmush farovonligini oshirish yo‘lida ko‘zga tashlanarli ishlar qildi. Eng muhimi, talabchan va harakatchan, mulohaza bilan ish ko‘radigan, uzoqni ko‘ra oladigan yosh rahbarlardan biri edi. Lekin umri qisqa ekan”, — degan viloyat hokimi.
Izoh (0)