Prezident administratsiyasi rahbari Sardor Umurzoqov boshchiligida 27-sentabr kuni bo‘lib o‘tgan videoselektor yig‘ilishda, lavozimiga noloyiq deb topilgan Andijon tumani hokimi Abdujabbor Egamberdiyev ishdan bo‘shatilgan.
Eslatib o‘tamiz, avgust oyida Andijon tumani hokimi Abdujabbor Egamberdiyevning hokimlik binosi hovlisida fuqarolar uchun bo‘lib o‘tgan sayyor qabuli keng muhokamalarga sabab bo‘lgandi. Unda hokim ayvon ichida o‘tirib, fuqarolarni esa ayvonda tashqariga o‘tqazib muloqot qilgan. Buni hokimlik ijtimoiy masofa saqlash uchun qilingan, deb izohlagan edi.
Selektor yig‘ilishida Sardor Umurzoqov har bir ishdan olingan hokimlarning yo‘l qo‘ygan kamchilik va xatolarini bir-bir sanab bergan. Sobiq hokimlar faoliyatiga baho berilar ekan, ularning xatti-harakatlari keng jamoatchilik e’tirozlariga sabab bo‘lganiga alohida e’tibor qaratilgan.
Yig‘ilishda Sardor Umurzoqov Andijon tumani hokimiga “Egamberdiyev, janobi oliylari, selektor yig‘ilishida ayvonda o‘tirmayaptilarmi?” deya kesatiq bilan murojaat qilgan.
“Hamma ko‘rdi. Butun dunyoga sharmanda bo‘ldik. Ayvonda o‘tirib olib, masofani saqlashni bahona qildingiz, unday bo‘lsa, nega sektor rahbarlarini yoningizga o‘tqazib qo‘ydingiz? Fuqarolarga nisbatan hurmatsizlik, dimog‘dorlik, kibr-havo. Bu nima degan gap? Butun jamiyatimiz, ijtimoiy tarmoqda qizg‘in muhokama va e’tirozlarga sabab bo‘ldi. Jamoatchilik oldida siz o‘zingizni emas, Andijon tumani hokimligini emas, butun davlat tizimini, butun prezident jamoasini obro‘sizlantirishga olib keldingiz. Shuning uchun hurmatli prezidentimiz qaror qabul qildilar: birinchidan, siz egallab turgan lavozimingizdan bugun ozod qilinasiz, ikkinchidan, sizning bu xatti-harakatingizga huquqiy baho beriladi”, — dedi Sardor Umurzoqov.
Eslatib o‘tamiz, ushbu videoselektor yig‘ilishida rahbarlik etikasi, xizmat vakolatidan chetga chiqish, fuqarolarga hurmatsizlik sabab 5 ta tuman hokimlari ishdan bo‘shatilgan.
Izoh (0)