“Janob Mo‘minov, yozmasangiz ham bo‘ladi. Kitobchangizni yoping, ruchkangizni kissangizga soling” — Farg‘ona tumani hokimi ishdan bo‘shatilib, guvohnomasi olib qo‘yildi (audio)

Prezident administratsiyasi rahbari Sardor Umurzoqov boshchiligida 27-sentabr kuni bo‘lib o‘tgan videoselektor yig‘ilishda Farg‘ona tumani hokimi Shuhratjon Mo‘minov ishdan olingan.

Yig‘ilishda administratsiya rahbari Shuhratjon Mo‘minovga yer sotish bo‘yicha alohida jinoyat ishi ochilganini eslatgan.

“Farg‘ona tumani, Mo‘minov. Siz juda yaxshi bilasiz, alohida jinoyat ishi qo‘zg‘atilgan. Sizning tumaningizda tendersiz yer maydonlarini ajratish bo‘yicha qarorlar chiqarilgan. Unumdor bo‘lgan 25 gektardan ko‘p yer maydonini biriktirish evaziga nimalar bo‘lganini ham juda yaxshi bilasiz”, — degan Sardor Umurzoqov.

Administratsiya rahbari Shuhratjon Mo‘minovga murojaat qilar ekan, unga yozmasa ham bo‘lishini, kitobchani yopib, ruchkani kissasiga solishini aytgan.

“Hurmatli prezidentimizning bugungi qarorlari bilan Farg‘ona tumani hokimi Mo‘minov egallab turgan lavozimidan ozod etildi. Zaldan chiqib keting. Xayrullo Hayitboyevich (viloyat hokimi), zaldan chiqib ketayotganda guvohnomasini topshirsin. Hali uning jinoiy javobgarlikka tortilishi yoki tortilmasligi masalasi bo‘yicha ikki hafta ichida gaplashamiz”, — degan administratsiya rahbari.

Eslatib o‘tamiz, Shuhratjon Mo‘minov 2020-yilning iyul oyida Farg‘ona tumani hokimi etib tayinlangan. Unga qadar Farg‘ona viloyati ichki ishlar boshqarmasi boshlig‘i o‘rinbosari vazifasida ishlagan.

Avvalroq ayvonda o‘tirib fuqarolarni qabul qilgan Andijon tumani hokimi Abdujabbor Egamberdiyev ishdan bo‘shatilgani haqida xabar berilgandi.