O‘zbekistonning 2022-yil yanvar—avgust oylaridagi tashqi savdo aylanmasi ma’lum bo‘ldi. Bu haqda Davlat statistika qo‘mitasi xabar bermoqda.
Joriy yilning dastlabki 8 oyida tashqi savdo aylanmasi 32,1 mlrd dollarni tashkil qilgan. Bu ko‘rsatkich o‘tgan yilning shu davriga nisbatan 7 mlrd dollarga ko‘proqdir.
Yanvar—avgust oylariga ko‘ra eksport 12,7 mlrd dollar bo‘lgan bo‘lsa, import 19,4 mlrd dollarga yetgan. 2021-yilning ilk 8 oyida bu ko‘rsatkichlar mos ravishda 9,3 mlrd dollar va 15,8 mlrd dollar edi.
O‘zbekiston yil boshidan beri qariyb 3 mlrd dollarlik oltin sotgan. Mamlakat mart oyidan beri oltin sotmayapti.
2022-yilning yanvar—avgust oylarida 6,7 mlrd dollarlik passiv tashqi savdo balansi kuzatildi. O‘tgan yili bu ko‘rsatkich 6,5 mlrd dollar edi.
O‘zbekiston eng ko‘p savdo qilayotgan 10 ta davlatdan 7 tasiga kamroq sotib, ulardan ko‘proq sotib olmoqda.
O‘zbekiston jahonning 188 mamlakati bilan savdo aloqalarini amalga oshirib kelmoqda. Tashqi savdo aylanmasining nisbatan salmoqli hissasi Xitoy (18,8 foiz), Rossiya (17,7 foiz), Qozog‘iston (8,9 foiz), Turkiya (7 foiz), Koreya (5,2 foiz), Qirg‘iz Respublikasi (2,4 foiz) va Germaniyada (2,2 foiz) qayd etilgan.
O‘zbekiston nima sotdi
Joriy yilning yanvar—avgust oylarida mamlakatning eksportyorlari soni 5 969 tani tashkil etib, ular tomonidan 9,7 mlrd dollar (oltindan tashqari) qiymatidagi (2021- yilning mos davriga nisbatan 67,6 foizga ko‘paydi) tovar va xizmatlar eksport qilinishi ta’minlandi.
Eksport tarkibida tovarlar ulushi 81 foizni tashkil etib, ular sanoat tovarlari (24,4 foiz), oziq-ovqat mahsulotlari va tirik hayvonlar (7,3 foiz) hamda kimyoviy vositalar va shunga o‘xshash mahsulotlar (6,7 foiz) hissasiga to‘g‘ri kelmoqda.
Miqdorlar haqida gapiradigan bo‘lsak, sanoat tovarlari 3,1 mlrd dollarga, oltin 2,97 mlrd dollarga, xizmatlar esa 2,4 mlrd dollarga sotilgan.
Yil boshidan beri yoqilg‘idan tashqari nooziq-ovqat mahsulotlari savdosi o‘tgan yilning shu davriga nisbatan kamaydi.
Tabiiy gaz eksport o‘tgan yilga nisbatan 61 foizga, neft va neft mahsulotlari esa 2 barobarga ko‘paydi. Boshqa davlatlardan elektr tokining yetkazib berilishi esa 3,3 foizga qisqargan.
Yanvar—avgust oylari yakunida eksport bo‘yicha asosiy hamkor davlatlar tarkibida Xitoy (eksport umumiy hajmining 14,6 foizi) va Rossiya (13,9 foiz) davlatlari yetakchilik qildi.
Toshkent shahri, Toshkent va Andijon viloyatlari xorijga eng ko‘p mahsulot sotgan. Eng kam sotganlar — Surxondaryo, Xorazm va Jizzax viloyatlari.
O‘zbekiston nima sotib oldi
Birinchi o‘rinda avvalgi yillardagi kabi sanoatni rivojlantirish uchun mashina va uskunalar (32,5 foiz).
Ikkinchi o‘rinda sanoat mahsulotlari (19,1 foiz) egallagan bo‘lsa, uchinchi o‘rinda kimyoviy vositalar va shunga o‘xshash mahsulotlar (13,7 foiz) egalladi.
Yil boshidan beri O‘zbekiston o‘tgan yilga nisbatan go‘sht va tamaki mahsulotlari importini qariyb ikki barobar.
O‘zbekiston 164 ta davlatdan tovar va xizmatlar importini amalga oshirdi. Yetti yirik hamkor davlatlar (Xitoy, Rossiya, Qozog‘iston, Koreya, Turkiya, Germaniya va Hindiston) jami importning 71,4 foiz ulushini tashkil etdi.
Hududlar bo‘yicha eng ko‘p import qilingan mahsulotlar Toshkent shahri, Toshkent va Andijon viloyatlariga to‘g‘ri keladi. Eng kami — Qashqadaryo, Qoraqalpog‘iston hamda Surxondaryo viloyatiga.
Izoh (0)