Avgust oyida Rossiyadan Xitoyga ko‘mir va tabiiy gaz eksporti tarixiy rekordga erishdi. Bu haqda Rossiyaning Xitoydagi elchixonasiga tayanib “Kommersant” xabar berdi.
Bojxona ma’lumotlariga ko‘ra, Xitoy o‘tgan oy Rossiyadan 409,37 million dollarlik tabiiy gaz import qildi, bu 2017-yilning yanvaridan beri kuzatilgan eng yuqori ko‘rsatkichdir.
Avgust oyida Rossiyadan Xitoyga ko‘mir eksporti ham besh yil davomida maksimal darajaga yetdi — 8,54 million tonna. Iyul oyiga nisbatan yetkazib berish 15 foizga, yillik ko'rsatkichlarda — 57 foizga oshdi.
Avgustda Yevropa Ittifoqining Rossiya ko‘miriga joriy etgan embargosi kuchga kirdi. Ayni paytda mamlakat ko‘mirining asosiy xaridori Xitoy, ikkinchi o‘rinda esa Hindiston. CoalMint agentligi ma’lumotlariga ko‘ra, Rossiya ko‘mirining mamlakatga importi avgust oyida rekord darajaga yetdi — 2,3 million tonna.
Avvalroq butun dunyo ko‘mirga qaytayotgan bir paytda, O‘zbekiston ham ishlab chiqarishni oshirayotgani haqida xabar berilgandi.
Izoh (0)