Rossiya logistika kompaniyasi Yaponiyadan O‘zbekistonga qatnovlarni tashkil qildi

Fesco transport guruhi Xitoy va Qozog‘iston hududi orqali Yaponiyadan O‘zbekistonga Fesco Trans China Railway intermodal qatnovini tashkil qildi. Bu haqda kompaniya matbuot xizmatiga tayanib “TASS” xabar bermoqda.

Fesco transport guruhi o‘z yo‘nalishlari tarmog‘ini kengaytirish maqsadida Xitoy va Qozog‘iston hududi orqali Yaponiyadan O‘zbekistonga Fesco Trans China Railway yangi intermodal konteyner tashish xizmatini yo‘lga qo‘ydi, — deyiladi xabarda.

Kompaniyaning ta’kidlashicha, xizmat qisman dengiz orqali Yokogama (Yaponiya) portidan Lyanyungan (Xitoy) portiga o‘tadi. 

So‘ngra konteynerlar Xitoy orqali Qozog‘iston chegarasigacha bo‘lgan temir yo‘l yo‘nalishi bo‘ylab harakatlanadi. 

“Qorg‘os-Oltinko‘l” chegara o‘tkazish punktida yuk 1520 kalibrli harakatlanuvchi tarkibga qayta yuklanadi, so‘ngra Toshkentdagi Chuqursoy stansiyasiga yetkaziladi. 

Konteynerlar oyiga ikki marta yuboriladi. Tashish uchun asosiy yuk Yaponiyadan avtomobil butlovchi qismlari bo‘ladi, — deya qo‘shimcha qildi Fesco.

Fesco port, temiryo‘l va integratsiya logistika biznesi sohasidagi aktivlarga ega bo‘lgan Rossiyadagi eng yirik xususiy transport va logistika kompaniyalaridan biridir.