Ўзбекистоннинг 2022 йил январь—август ойларидаги ташқи савдо айланмаси маълум бўлди. Бу ҳақда Давлат статистика қўмитаси хабар бермоқда.
Жорий йилнинг дастлабки 8 ойида ташқи савдо айланмаси 32,1 млрд долларни ташкил қилган. Бу кўрсаткич ўтган йилнинг шу даврига нисбатан 7 млрд долларга кўпроқдир.
Январь—август ойларига кўра экспорт 12,7 млрд доллар бўлган бўлса, импорт 19,4 млрд долларга етган. 2021 йилнинг илк 8 ойида бу кўрсаткичлар мос равишда 9,3 млрд доллар ва 15,8 млрд доллар эди.
Ўзбекистон йил бошидан бери қарийб 3 млрд долларлик олтин сотган. Мамлакат март ойидан бери олтин сотмаяпти.
2022 йилнинг январь—август ойларида 6,7 млрд долларлик пассив ташқи савдо баланси кузатилди. Ўтган йили бу кўрсаткич 6,5 млрд доллар эди.
Ўзбекистон энг кўп савдо қилаётган 10 та давлатдан 7 тасига камроқ сотиб, улардан кўпроқ сотиб олмоқда.
Ўзбекистон жаҳоннинг 188 мамлакати билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссаси Хитой (18,8 фоиз), Россия (17,7 фоиз), Қозоғистон (8,9 фоиз), Туркия (7 фоиз), Корея (5,2 фоиз), Қирғиз Республикаси (2,4 фоиз) ва Германияда (2,2 фоиз) қайд этилган.
Ўзбекистон нима сотди
Жорий йилнинг январь—август ойларида мамлакатнинг экспортёрлари сони 5 969 тани ташкил этиб, улар томонидан 9,7 млрд доллар (олтиндан ташқари) қийматидаги (2021- йилнинг мос даврига нисбатан 67,6 фоизга кўпайди) товар ва хизматлар экспорт қилиниши таъминланди.
Экспорт таркибида товарлар улуши 81 фоизни ташкил этиб, улар саноат товарлари (24,4 фоиз), озиқ-овқат маҳсулотлари ва тирик ҳайвонлар (7,3 фоиз) ҳамда кимёвий воситалар ва шунга ўхшаш маҳсулотлар (6,7 фоиз) ҳиссасига тўғри келмоқда.
Миқдорлар ҳақида гапирадиган бўлсак, саноат товарлари 3,1 млрд долларга, олтин 2,97 млрд долларга, хизматлар эса 2,4 млрд долларга сотилган.
Йил бошидан бери ёқилғидан ташқари ноозиқ-овқат маҳсулотлари савдоси ўтган йилнинг шу даврига нисбатан камайди.
Табиий газ экспорт ўтган йилга нисбатан 61 фоизга, нефть ва нефть маҳсулотлари эса 2 баробарга кўпайди. Бошқа давлатлардан электр токининг етказиб берилиши эса 3,3 фоизга қисқарган.
Январь—август ойлари якунида экспорт бўйича асосий ҳамкор давлатлар таркибида Хитой (экспорт умумий ҳажмининг 14,6 фоизи) ва Россия (13,9 фоиз) давлатлари етакчилик қилди.
Тошкент шаҳри, Тошкент ва Андижон вилоятлари хорижга энг кўп маҳсулот сотган. Энг кам сотганлар — Сурхондарё, Хоразм ва Жиззах вилоятлари.
Ўзбекистон нима сотиб олди
Биринчи ўринда аввалги йиллардаги каби саноатни ривожлантириш учун машина ва ускуналар (32,5 фоиз).
Иккинчи ўринда саноат маҳсулотлари (19,1 фоиз) эгаллаган бўлса, учинчи ўринда кимёвий воситалар ва шунга ўхшаш маҳсулотлар (13,7 фоиз) эгаллади.
Йил бошидан бери Ўзбекистон ўтган йилга нисбатан гўшт ва тамаки маҳсулотлари импортини қарийб икки баробар.
Ўзбекистон 164 та давлатдан товар ва хизматлар импортини амалга оширди. Етти йирик ҳамкор давлатлар (Хитой, Россия, Қозоғистон, Корея, Туркия, Германия ва Ҳиндистон) жами импортнинг 71,4 фоиз улушини ташкил этди.
Ҳудудлар бўйича энг кўп импорт қилинган маҳсулотлар Тошкент шаҳри, Тошкент ва Андижон вилоятларига тўғри келади. Энг ками — Қашқадарё, Қорақалпоғистон ҳамда Сурхондарё вилоятига.
Изоҳ (0)